Adam-e Khub/ آدمِ خوب


خود خو از دیگا بہتر یا خوب تر فکر کدو یک زہنیت استہ کہ خوب خوب آدما رہ چمای شی کور کدہ و دماغ (فکر) شی لنگ کدہ۔ ما خوب استوم یک مرض استہ کہ صحت مند نفرا رہ ناجور کدہ۔ کسائیکہ دہ ای مرض مبتلا استہ اونا ہمیشہ دہ یک فکر استہ کہ اونا بسیار آدمِ آگاہ، اوشیار ، خانندہ و خوش اخلاق استہ۔ اونا باور درہ کہ اونا ہر چیز رہ موفامہ۔ از ہر چیز خبر دره. ہر سوال رہ جواب شی خبر درہ۔ اونا دہ یک فکر استہ کہ بجوز خودگون شی دیگا تمام احمق، بے عقل، بے ہنر، بدنمنہ و بد اخلاق استہ۔ برای ازی کہ خود خو رہ خوب بوگیہ اونا دیگا رہ بد موگیہ۔ اونا ہمیشہ خواہش درہ کہ ہر آدم گپ ازونا رہ گوش کنہ و اونا رہ تعریف کنہ کسائیکہ تعریف مونہ اونا رہ خوب و کسائیکہ نمونہ اونا رہ بد موگیہ۔ ای رقم آدما ہمیشہ خود خو یک کلان شخصیت فکر مونہ۔ ہمیشہ دہ حالتِ پرٹوکول استہ۔ از ہر کس خواہش درہ کہ اونا رہ عزت کنہ۔ بظاہر خوش اخلاق معلوم موشنہ مگہ نفرت ، تعصب و خود پسندی دہ مینے خون ازینا غرق استہ۔
مثلن، آدمای مذہبی ہمیشہ خودگون خو رہ خوب انسان فکر مونہ۔ اونا یقین درہ کہ اونا از تمام بہتر انسان استہ۔ اونا مذہب رہ خوش درہ مگہ فقط مذہب از خود خو۔ فرقہ رہ دوست درہ مگہ فقط فرقے از خود خو۔ نماز رہ خوش درہ مگہ فقط طریقے نماز از خود خو۔ برای ازی کہ مذہب یا فرقے از خود خو خوب بوگیہ اونا دیگا مذاہب یا فرقہ ہا رہ بد موگیہ۔ اگہ از بد گفتو ام دل شی قرار نگرفت توہین مونہ۔ اگہ از توہین ام دل شی قرار نگرفت اونا رہ کافر موگیہ۔ اگہ از کافر گفتو ام دل شی قرار نگرفت اونا رہ موکشہ۔ اگہ از کشتو ام دل شی قرار نگرفت قد خود خو قاتی قاتی اونا رہ ام ‘شہید’ مونہ۔ Continue reading

Brian & Stomach/زہن و ک‍ورہ

چند روز پیش کم کورہ درد بودوم خاتو صایب گفت کہ ما شاید یگو دیر مندہ چیز خوردہ باشوم ازو خاطر کورہ درد شودوم۔ کلو فکر کدوم مگہ دہ یاد مہ نماد کہ چیز خوردہ بودوم البتہ گپ ای نیہ کہ ما چیز خوردہ بودوم گپ ای استہ کہ اگہ فرضِ محال ما یگو دیر مندہ چیز خوردہ بودوم چرا کورہ درد شودوم۔ چرا کورہ ری ایکشن نشان دد؟ چرا واویلای شی بور شد؟
وقتیکہ مو زہن رہ توخ مونی اونا کورہ وری نالہ نمونہ اونا دہ غم ازی نیہ کہ آیا ای فکر دیرمندہ استہ یا کوہنہ – یک ہفتنہ استہ یا ہزار سالہ – راس استہ یا دورغ – اید دہ فکر شی نیہ اَر چی کہ دہ گیر شی اماد قبول مونہ۔

امروزنہ سوال یا گپ ام امی استہ کہ کورہ چرا دیرمندہ چیزا رہ قبول نمونہ و زہن چرا قبول مونہ۔
Continue reading

Human/اشرف المخلوقات

“موگیہ کہ انسان اشرف المخلوقات استہ یعنی انسان از تمام مخلوقات، انس و جنس بہتر، برتر و مقدس استہ۔ تقریبن تمام مذاہب امی گپ رہ موگیہ۔ انسان برای ازی کہ زندہ بومنہ موگیہ حق درہ کہ حیوانا رہ بوکشہ گوشت شی بوخرہ و سودا کنہ۔ برای مختلف مقاصد خو درختا رہ قلم قچار کدہ استعمال کنہ یا دہ خانے خو در بیدیہ۔ دہ روی زمین اگہ یگو آلف، سوزی یا دانہ استہ اونا رہ برای وسیع تر مقاصد خو بوخرہ یا استعمال کنہ۔
ازو بعد ام اگہ انسان دل شی قرار نگرہ، انسان و حیوان رہ دہ نامِ مذہب بوکشہ۔ از زیرِ زمین معدنیات رہ بور کنہ و روی آسمان رہ از دوود سیاہ کنہ۔
خلاصہ انسان کہ خود خو مقدس موگیہ از خاطرِ شخصی یا اجتماعی کارای خو متاسفانہ نظامِ فطرت رہ مسلسل تباہ کدہ رئیہ۔ عمرِ زمین تقریبن 4.5 بلین سال استہ۔ ارکیالوجسٹ موگیہ کہ انسان رہ تقریبن دو لک سال شدہ کہ دہ روی زمین امدہ۔ Continue reading

Do Waqiay/دو واقعہ


زمانای نوجوانی بود بخیالم نہم میخاندوم۔ ہفتم یا ہشتم محرم بود۔ بیگاہ، ساعتای شش یا ہفت بود کم تاریک شدہ رئی بود۔ بابے مہ خدا بیامورزہ از خاطرِ یگو کار مرہ مشین روڈ کوئٹہ رئی کد۔ زود سائیکل خو گرفتوم۔ از خانہ برو امادوم۔ سائیکل چلاندہ بلے علمدار روڈ امادوم۔ آوازای نوحہ و مجلس از چند دکانا و سبیلہا میماد مگہ غئیدیکہ نزدیکِ جامعہ امام صادق رسیدوم آوازای نوحہ و ماتم زیاد شدہ رئی بود بخاطریکہ آوازای نوحہ و ماتم از سپیکرای مختلف امام بارہ گاہ بلخصوص امام بارگاہِ سیدآباد، امام بارہ گاہِ بلتستانیا و امام بارہ گاہِ نچاری میماد۔ دہ علمدار روڈ ایتر احساس موشد کہ از ار گوشے آسمان آوازِ نوحہ و ماتم میماد یا مثلیکہ تمام دنیا غم گرفتہ بود۔ وقتیکہ کم تاہ رفتوم آوازای نوحہ و ماتم از امام بارگاہِ گلگتیا، قندھاریا و پنجابیا ام میماد۔ Continue reading

Eidi/عیدی

از عید تقریبن دو ہفتہ تیر شدہ بود۔ بیگاہ ساعتای پنج بود دہ تائنہ خانہ شیشتہ بودوم ٹی وی توخ کدہ رئي بودوم کہ دروازے اولی ٹخ ٹخ شد۔ از خانہ برو بور شدوم کہ طرفِ دروازے اولی بوروم مگہ ریزہ خواہر مہ از مہ پیش طرفِ دروازے اَولی ڈبل کدہ رافت۔
“دروازہ رہ ما واز مونوم،” دہ آوازِ بلند گفت۔
ما تای برنڈہ ایستہ شدوم کہ توخ کنوم کی باشہ۔ خواہر مہ دروازہ رہ واز کد۔ وقتیکہ دروازے اولی واز شد یک بلوگ خاتنو و دخترو درونِ اولی داخل شد۔ بلے سرِ یک خاتو کلان پتنوس بود۔ یک دختر دہ آوازِ ڈم ڈم ڈق -ڈم ڈم ڈق دریہ ذدہ رئی بود۔ دیگا دہ آوازِ دریہ چکو زدہ رئی بود۔ ائیکے مہ غئیدیکہ خاتنو رہ دید زود طرف ازونا رافت تا اونا رہ خوش آمدی بوگیہ۔ ما شرم خوردوم زود واپس درونِ خانہ امادوم۔ غول اَولی از آواز و خندے خاتنو پور شد۔ آوازِ ڈم ڈم ڈق -ڈم ڈم ڈق ام زیاد شد۔ از یک کنارے کیلکین پوٹکی توخ کدوم مینگرنوم کہ کلان پتنوس بلے سرِ ائیکے مہ استہ دہ آواز دریہ گول چکر ذدہ رئیہ۔ دیگا خاتنو دہ گیردوُور شی دہ جوش و خروش چکو ذدہ رئیہ۔ دہ زندگی ائیکے خو ایتر خوش نہ دیدہ بودوم۔ از خوشی اَودیدے مہ کئی تاہ چقید – خبر نشودوم۔ دلم میخواست کہ زود برو بوروم دیست ائیکے خو گرفتہ دہ آوازِ ڈم ڈم ڈق قنجخے شی یکجئی گول چکر دییوم مگہ نہ تنستوم بخاطریکہ دو کلان گِرنگ گونیای شرم و حیا دہ آر دو پای مہ مضبوط بستہ بود۔ زود اَودیدے خو پاک کدوم۔ تقریبن یگو ہشت نو دقیقہ بعد ائیکے مہ تمام خاتنو و دخترو رہ قنجخے پتنوس دہ بالنہ خانہ (بئیٹک) بورد۔
Continue reading