Iman/ ایمان

صوب تقریبن ساعتای دہ بود۔ ٹرین سٹیشن رافتوم۔ ٹکٹ خریدہ بلے پلیٹ فارم امادوم۔ یک منٹ بعد ٹرین اماد۔ بلے پلیٹ فارم ایستاد شود۔ بلے ٹرین بال شودوم۔ رش نہ بود۔ زیاد سیٹا خالی بود۔ بلے یک سیٹ پہلوی ٹیبل شیشتوم۔ بلے ٹیبل روبروی مہ یک لوکل اخبار پورتاو بود۔ اخبار رہ گرفتہ خاندو شروع کدوم۔ یک منٹ بعد ٹرین رئي شود۔ یگو ہفت منٹ بعد ٹرین بلے یک دیگہ اسٹیشن ایستاد شود۔ دیگہ مسافرا بلے ٹرین بال شود۔ دہ ای دوران یک نفر گوڈ مارننگ گفتہ روی بروی مہ شیشت۔
گوڈ مارننگ شی خلافِ توقع بود ازو خاطر چند مائیکرو سیکنڈ وری حیران شودوم مگر زود موسخندی کدہ اونا رہ گوڈ مارننگ گفتوم۔ اونا تقریبن دہ عمرای شست سالہ بود۔ مردم عمومن بلے بس یا ٹرین قد نفرِ ناشناختہ گپ نمیزنہ مگر ای نفر از شکل خو آدمِ خوش اخلاق دیدہ موشود۔“امروز خوب گرمی استہ!” اونا دوبارہ گپ زد۔
“آن، از دیروز خوب تر استہ،” گفتوم۔ بخیالم دل شی گپ زدو میخایہ دہ دل خو گفتوم۔ اخبار رہ بلے میز ایشتوم۔
“از کارڈف مایین؟” اونا پرسان کد۔
“آن،” جواب ددوم۔
” دہ کارڈف زندگی مونین؟”
“آن۔”
“اگر مائنڈ نمونین یک سوال کنوم؟”
“مشکل نیہ؟”
“از کدوم کشور استین؟””شمو بوگین ما از کدوم کشور استوم؟” ازی پیشتر کہ ما جواب بیدوم ازونا پرسان کدوم۔
“بخیالم کہ شمو از ملائشیا یا ۔۔۔از تھائ لینڈ استین،” طرف مہ توخ کدہ گفت۔
“نہ، از ہر دوی شی نی استوم،” گفتوم۔
“از انڈونیشیا ۔۔۔ یا امکان درہ از چائنا باشین،” اونا دوبارہ گفت۔
“نہ۔ بوبخشین۔۔۔ از ای ہر دو شی ام نی استوم،” ما گفتوم۔
“ولہ چی بوگوم، دیگہ؟ ۔۔۔ بہتر استہ کہ شمو خودون شوم بوگین،” اونا خندہ کدہ گفت۔
“دہ پاکستان پیدا شودوم،” گفتوم۔”چی؟۔۔۔ دہ پاکستان پیدا شودین ۔۔۔ اید پاکستانی معلوم نموشین،” اونا دہ حیرانی گفت۔
” آ ولہ، راس موگین ۔۔۔ مو یک ریزہ قوم دہ پاکستان استے،” گفتوم۔
“یقینن مسلمان باشین؟” دوبارہ سوال کد۔
“بلے، مسلمان استوم،” گفتوم۔
“اگر اجازہ باشہ یگ سوال کنوم؟”
“بلے، مشکل نیہ۔”
“تشکر۔ ما دہ مذاہب کم دلچسپی دروم۔ ازو خاطر خاہش دروم کہ یگو نو چیز یاد بیگروم۔””بسیار خوب، یقینن خوب عادت استہ۔ آدم باید ہمیشہ نو گپا یاد بیگرہ،” ما گفتوم۔
“رفیقای از مہ از مختلف مذاہب استہ۔ ما تمام مذاہب رہ احترام مونوم البتہ خود مہ مذہبی نیوم۔ سوالہا دہ زہن مہ زیاد استہ۔ اکثر از رفیقا یا از مختلف نفرا پرسان مونوم تا یگو جواب دہ گیر بایہ۔” اونا گفت و دوبارہ طرف مہ دہ غور توخ کد “خبر نیوم کہ پرسان کنوم یا نہ؟”
“اگر دل شوم میخایہ پرسان کین، مشکل نیہ،” دوبارہ تسلی ددوم تا اونا سوال پرسان کنہ۔” تشکر۔ خوب بیل کہ پرسان کنوم دیگہ۔ امی دہ مطابق مذہب از شمو — آیا یک خوب مسلمان بعد از مرگ دہ بہشت مورہ؟” اونا پرسان کد۔
“بلے، امیتر موگیہ،” گفتوم۔
“غئیدیکہ دہ بہشت رافت ما شنیدوم کہ اونا دہ اونجی شراب موخرہ۔ شیر موخرہ۔ میوہ موخرہ۔ ما شنیدوم کہ دہ بہشت از شمو حور و غلمان ام استہ۔”
“ولہ چی بوگوم مردم امیتر موگیہ۔ یگو از بہشت واپس نمدہ کہ آدم ازونا کنفرم کنہ،” گفتوم۔
“خوب، سوال ازمہ ای استہ کہ آیا یک آدمِ مردہ دہ مطابق فکر از تو آو خوردہ میتنہ؟” اونا پرسان کد۔”ولہ نفامیدوم؟” گفتوم۔
“خوب دہ الفاظِ دیگر امی آدم کہ بومرہ یعنی جان (جسم) نہ داشتہ باشہ آیا اونا میوہ خوردہ میتنہ؟” اونا دوبارہ پرسان کد۔
“بسیار بوبخشین، نفامیدوم؟” دوبارہ پرسان کدوم۔
“چتور بوگوم؟۔۔۔” اونا کم فکر کد و بعد ازو دوبارہ گفت ” امی آدم غئیدیکہ فوت مونہ — جان (جسم) خو یقینن دہ امینجی میلہ؟
“آن، دہ امینجی میلہ،” گفتوم۔
اونا قد امزی جان خو یقینن دہ بہشت نمورہ؟” پرسان کد۔
“نہ، نمورہ،” گفتوم۔”خوب، اگر قد جان یعنی جسم خو دہ بہشت نمورہ آدم بغیر یگو جان چتور شراب، آو یا میوہ بوخورہ؟” اونا پرسان کد و دوبارہ گفت “خدا خبر گپ مہ فامیدین یا نہ؟”
“کم کم فامیدوم،” گفتوم۔
“خوب شمو رہ دہ آسان الفاظ موگوم۔ قانون فطرت ای رہ موگیہ کہ آدم بغیر جسم آو خوردہ نمیتنہ، نان خوردہ نمیتنہ، راہ رفتہ نمیتنہ، شراب خوردہ نمیتنہ۔ اگر جسم نباشہ امی حور یا غلمان — چیز کارہ یہ؟ موفامین کہ ما چیز موگوم۔”
“بلے موفاموم کہ چیز موگین،” گفتوم و بعد ازو دوبارہ گوفتوم “دہ مطابقِ مذہب از مو مردہ دہ آخرت (روزِ قیامت) دوبارہ زندہ موشنہ۔”“اگر دوبارہ زندہ موشنہ اونا چرا مومرہ؟” اونا سوال کد و دوبارہ سوال کد “اگر حساب کتاب بعد از مرگ موشنہ چرا دہ ای دنیا — پیش از مرگ نموشہ؟ ۔۔۔ چرا خدای شمو بلے ازی دنیا اختیار ندرہ کہ حساب کتاب دہ ای دنیا کنہ؟” دیگہ سوال پرسان کد۔
ما میخاستوم کہ جواب ازینا رہ بیدوم کہ دہ ای دوران ٹرین ایستاد شود۔ از کیلکین ٹرین برو توخ کدوم کہ بریجنڈ ٹرین اسٹیشن بود۔ زود ایستہ شودہ گفتوم “بسیار خوب سوالہا کدین۔ فعلن موروم کہ منزل مہ رسید۔ بعض انشاالله یگو روز دیگہ کہ روی بروی شودی گپ میزنی۔”
قد ازونا خدا حافظی کدہ از بلے ٹرین تاہ شودوم مگر افسوس کدوم کہ منزل مہ زود رسید ورنہ قریب بود کہ ایمان ازونا رہ خراب کدہ بودوم۔

Leave a Reply

Your email address will not be published.

This site uses Akismet to reduce spam. Learn how your comment data is processed.