Osain Alai Eusofi/اوسین الی ایسوفی

کتابِ “فرہنگِ ادبیات ھزارہ گی: ضرب المثال و محاورات” دہ فروری 2010 دہ چھاپ رسید۔ بلے کتاب دہ تای ٹائٹل شی قد سفید رنگ نامِ حسین علی یوسفی واضح نوشتہ استہ۔ اولنہ نام ازونا قد ح۔س۔ی۔ن یعنی حسین نوشتہ استہ۔ دومنہ نام ازونا قد ع-ل-ی یعنی علی نوشتہ استہ و عین اموتر سیومنہ نام شی قد ی۔و۔س۔ف۔ی نوشتہ استہ۔ مکمل نام ازونا حسین علی یوسفی استہ۔ ای نام رہ یگو دیگہ کس بلے کتاب ازونا نوشتہ نکدہ بود بلکہ اونا خودون شی قد قلم از خود خو نوشتہ کدہ بود۔
یوسفی وقتیکہ حیات بود تمام نام ازونا رہ قد درست ہجہ (حرف) یعنی حسین علی یوسفی نوشتہ و یاد موکد۔ آلی غئیدیکہ اونا از دنیا رفتہ بعض آپوسقالہا نام ازونا رہ قد غلط ہجہ یعنی اوسین الی ایسوفی نوشتہ مونہ بخاطریکہ دہ مطابقِ فکرِ ازونا حسین علی یوسفی آزرہ گی یاد ندشت و اونا نام خو ام نموفامید کہ چیتور نوشتہ کنہ ازو خاطر آلی چند ہوشیار نفرا جم شودہ نامِ حسین علی یوسفی رہ درست کدہ رئیہ۔
اگر یوسفی زندہ موبود آیا اونا ای آپوسقالہا رہ اجازہ میدد کہ ہجے نام ازونا رہ تغیر بیدیہ — یقینن نمیدد بخاطریکہ اونا نام خو دہ واضح الفاظ دہ بلے کتاب خو دہ مکمل احترام حسین علی یوسفی نوشتہ کدہ بود نہ کہ اوسین الی ایوسوفی۔

بعد از نامِ حسین علی یوسفی — بوبخشین اوسین الی ایسوفی ، از بروری آوال امدہ رئیہ کہ ای آپوسقالہا دیست خو بلے کتاب و نوشتای یوسفی ام دراز کدہ رئیہ و دہ ای بابت گوفتہ موشنہ کہ اونا انشاالله دہ زودی و از حمایتِ ایچ ڈی پی اُو تمام الفاظ و حروف مثلن ح، ص، ض، ط، ظ، ع، ے یوسفی کہ دہ کتابِ ضرب المثل آزرہ گی خو نوشتہ کدہ بود غائب موشنہ چراکہ یوسفی نموفامید کہ آزرہ گی چتور نوشتہ موشنہ یا کودم حرف باید دہ آزرہ گی باشہ۔

آدم حیران موشنہ کہ دہ گردوُور آدم چیز کارا شودہ رئیہ۔ مثلن از نام یوسفی متاسفانہ او آدما شخصی حمایت و شہرت گرفتہ رئیہ کہ اونا قد نوشتے یوسفی اید اتفاق ندرہ۔ ای رقم آدما روزانہ یوسفی یوسفی مونہ۔ کلان کلان پوسٹرای شی چھاپ مونہ۔ فنکشنز میگرہ۔ یوسفی رہ خلاصہ اونا یک قسم رہبرِ آزرہ گی فکر مونہ مگر آزرہ گی نوشتای یوسفی رہ احترام نمونہ۔ از تمام زیاد حیران کن و قابلِ تشویش گپ ای استہ کہ ایچ ڈی پی و حمایتای شی او فرد یا گروہ رہ حمایت مونہ کہ اونا ضدِ آزرہ گی نوشتے یوسفی استہ — اصولن باید نباشہ مگر استہ۔ خدا خبر چرا استہ — یقینن جای افسوس استہ۔

نوٹ: امیدوارم کہ یگو مرہ دو دشنام نمونہ۔ البتہ اگر یگو بلے آزرہ گی نوشتای یوسفی اعتراض درہ اونا بیشک کمنٹ کنہ۔ ما خود مہ شخصن قد آزرہ گی نوشتای یوسفی مکمل اتفاق دروم و دہ ای بابت یوسفی رہ احترام مونوم و کسائیکہ ہمیشہ یوسفی یوسفی مونہ اونا باید کتابِ یوسفی رہ بیخانہ۔

Leave a Reply

Your email address will not be published.

This site uses Akismet to reduce spam. Learn how your comment data is processed.