Qasam/قسم

ما قسم خو پورا کدہ وقتیکہ از شیلہ برو امادوم رضا رہ نہ دیدوم۔ ای بغل او بغل توخ کدوم مگر رضا معلوم نشود۔ یک ریزہ بچے محلہ پہلوی مہ ایستہ بود طرف مہ توخ کدہ رئي بود ازو پرسان کدوم “رضا کجا شود؟”
“او نو سون رافت،” طرفِ یک ریزہ گلی اشارہ کدہ گوفت۔
کم بال رافتوم دہ کنارے گلی مینگرنوم کہ یک فُٹبالی و پَئیچے مَئیلہ شور خوردہ رئي بود۔ نزدیک شی رسیدوم مینگرنوم کہ رضا دہ پہلوی دیوالِ گیلی شیشتہ یک اخبارِ کوہنہ و پارہ خاندہ رئی بود۔
“یار، تو باید بوٹای خو صاف کنی تو اخبار خواندہ رئي یی،” ما کم دہ قار گفتوم۔
“نہ یار، دَرو توخ مونوم کہ یگو نامِ خدا یا آیاتِ قرآن نہ باشہ،” رضا گوفت۔
“یار، کم اخبار شی مرا ام بیدی کہ ما بوٹای خو صاف کنوم۔”
“صبر کو یار،” رضا اخبار رہ دہ غور توخ کدہ گوفت۔
کالای ازونا آسمانی رنگ بود و فٹبالی شی سفید مگر ہر دو فٹبالی شی از مئیلگی سیاہ میزد و پائ چپ شی تا زانو دہ مینے آوِ شیلہ غُوٹہ شودہ بود۔ از اخبار کہ دل شی تسلی شود اونا فٹبالی خو قد اخبار صاف کدو شروع کد۔ ما ام دہ ای دوران یک ٹوٹے اخبار برای خو پیدا کدوم و بوٹای خو صاف کدو شروع کدوم۔ ہر دو پئیچے مہ مئیلہ بود و بوی ام میدد۔
“یار، دلم موشہ مہدی رہ قسم بیدوم کہ ہر کس امسال دہ سالانہ امتحان فیل شونہ ائیکے ازونا بومرہ،” رضا فٹبالی خو صاف کدہ دہ قار گوفت۔
ما و رضا، ہر دوی مو کلاس فیلو بودی و دہ کلاسِ ششم یکجئی میخاندی۔ مہدی ازمو کم کلان بود۔ اونا دو سال دہ کلاسِ ششم فیل شودہ بود۔
مہدی یک عادت دشت کہ اونا ہر کار رہ دہ مطابق مرضی خو میخاست۔ اگر یگو او کار رہ نموکد اونا رہ قسم میدد کہ ائیکے ازونا باید امشاؤ بومرہ۔
ایمروز ام ما، رضا و مہدی ہر سہ مو دہ محلہ پوٹلی بازی کدہ رئی بودی۔ رضا اینٹای شی واز بود۔ مہدی دَرو بَئي ددہ رئي بود۔ دورانِ بازی، رضا پوٹلی شی لول خوردہ دہ مینے شیلہ تاہ پرید۔ اونا زود ڈبل کدہ طرفِ شیلہ رافت۔
“نرو یار مینے شیلہ از خاطرِ یک پوٹلی،” ما گوفتوم۔
“نہ یار، او خوب اینٹی استہ،” رضا گوفت و مینے شیلہ تاہ شود۔
مہدی وقتیکہ رضا رہ مینے شیلہ دید۔ اونا فورن گوفت “ بیا مینے شیلہ ٹوپ ٹوپ بازی کنی۔”
“نہ یار، ما خو بازی نمونوم،” ما گوفتوم۔
رضا وقتیکہ از مینے شیلہ برو اماد مہدی دہ ای دوران فورن مینے شیلہ ٹوپ کد و گوفت “ہر کس ٹوپ نکنہ — خدا کنہ ایمشاؤ ائیکے شی بومرہ۔”
“یار، قسم نہ دی دیگہ،” رضا گوفت۔
“مرضی شمو، آلی ما خو قسم دَدوم،” مہدی گوفت و دوبارہ دہ آوازِ بلند گوفت “ہر کس ائیکے خو خوش درہ اونا باید ٹوپ کنہ۔”
ما طرف رضا توخ کدوم رضا طرف مہ۔ اونا پوٹلیا خو کہ دہ مینے بغل جیبی شی بود دہ مینے تمبوی خو تای شولبند کد و بعد ازو فورن دہ مینے شیلہ ٹوپ کد۔
مہدی طرف مہ توخ کدہ گوفت “بیا زوی، تو ام ٹوپ کنو اگر ائیکے خو خوش درے۔”
“ما ام ائیکے خو خوش دروم،” دہ دل خو گوفتہ مینے شیلہ ٹوپ کدوم۔ ہر دو پائ مہ تَرققاس کدہ مینے آوِ شیلہ خورد — قد بوٹای مہ قاتی قاتی تمبوی ما ام مئیلہ شود۔
“یار، ای اید صاف نموشہ،” رضا اخبار رہ پورتاو کدہ دہ قار گوفت۔ “ای رہ چتور صاف کنوم؟”
“بیا بوری دہ امام بارہ، دہ اونجی بوشری،” ما مشورہ ددوم۔
“آلی نموشہ یار، بیگاہ شودہ — وقتی آزان استہ۔ اگر چوکیدار بینگرنہ اونا میزنہ،” رضا گوفت۔
“اگر قد ازی مئیلگی دہ خانہ بوری ہر دوی مو ٹب موخری،” ما گفتوم و چند سیکنڈ بعد دوبارہ پرسان کدوم “دہ کجا بوری دیگہ؟”
“دہ پیش دکان بابے قمبر یک نلکہ استہ،” رضا مشورہ دد۔ “بوری دہ اونجی بوشیی۔”
ہر دوی مو ڈبل کدہ طرفِ نلکہ رافتی۔ غئیدیکہ نزدیکِ نلکہ رسیدی رضا زود نلکہ رہ واز کد مگر آو نماد۔ اونا دوبارہ نلکہ رہ بند کد — واز کد مگر آو بسم نماد۔ سرِ بیگاہ بود۔ تاریکی زیاد شودہ رئي بود۔ آوازای آزان ام از گرد گوشہ امدہ رئي بود۔
“آلی چی کار کنی؟ کجا بوری؟ قد ازی مئیلگی اگر خانہ بوری ٹب موخری،” رضا تشویش کد۔
ما جواب نہ ددوم۔ ہر دوی مو امند امند طرفِ خانہ رئي شودی۔ دہ سرِ گلی پیش تندور رش بود۔ یک خاتو طرف ازمو توخ کدہ رئي بود۔ رضا طرف بوٹ و تمبوی خو توخ کدہ رئي بود۔ وقتیکہ کم دیگم پیش رافتی امو خاتو ائیکے رضا بود اونا طرف رضا توخ کدہ گوفت “اَو، دیو زدہ تو رہ چیز کدہ؟”
“ائیکہ مینے شیلہ تاہ پریدوم،” رضا گوفت۔
“تو کور بودی کہ تاہ پریدی؟” ائیکے شی از گوشای رضا گرفتہ دہ قار پرسان کد۔ ما دہ ای دوران دیگہ طرف توتا کدوم۔ ائیکے شی چپلاخ زدہ اونا رہ طرفِ خانہ بورد و گوفتہ رئي بود “ایمروز چشت تازہ تو رہ غسل ددہ بودوم و کالای نَو ام دہ جان تو ددہ بودوم و تو مینے شیلہ بازی کدی۔”
“نہ ائیکہ مینے شیلہ بازی نکدوم بخدا خطا شودوم،” رضا گریہ کدہ گوفت۔
“مینے شیلہ سر تو چاہ بود۔۔۔۔۔”
آواز ائیکے رضا امدہ رئي بود و ما دہ ای دوران فکر کدہ رئي بودوم کہ ائیکے رضا چرا نموفامہ کہ رضا اونا رہ ایمروز از دانِ مرگ واپس آوُوردہ۔ اگر رضا ایمروز قسم رہ پورا نموکد ائیکے ازونا ای وقت گاہ مردہ بود مگر ائیکے رضا ای گپ رہ نموفامید خدا کنہ ائیکے ازمہ بوفامہ۔


نوٹ: امداد علی کلان خواہرزادے مہ استہ۔ اونا ای سٹوری رہ از آسٹریلیا برای ازمہ رئي کد۔ ما وقتیکہ سٹوری رہ دیدوم خوش مہ امادوم۔ بعد ازو بلے واشنگ سپنج واشنگ لیکویڈ اندختہ سٹوری رہ خوب شوشتوم و قد آو گرم شیپقہ کدہ سٹوری رہ صاف ستھرا کدوم تا دوستا از خاندوی شی لطف بیگرہ۔

Leave a Reply

Your email address will not be published.

What is 8 + 5 ?
Please leave these two fields as-is:
IMPORTANT! To be able to proceed, you need to solve the following simple math (so we know that you are a human) :-)