Hazaragi Alphabets/ ہزارہ گی حروف تہجی

دیروز، دہ بروری چند ماہرِ زبان بعد از بسیار تحقیق، عرق ریزی، گفتو شنید و کتاب خاندو اونا باقاعدہ آزرہ گی حروف تہجی رہ از دیستِ مبارک ایچ ڈی پی افتتاح کد۔ دہ ای جلسہ نو منتخب آزرہ گی رہبرا، شاعرا و چند دانشورا ام تشریف دشت۔
افرادای کہ دہ ای کار پیش بود گفت کہ اونا از ہر پہلوی آزرہ گی زبان بلخصوص آواز رہ مدنظر ایشتہ ای حروف تہجی رہ تشکیل ددہ۔ برای آواز اونا لفظ phonology استعمال کد۔ بسیار خوب۔ البتہ اونا ای گپ رہ نگفت کہ کودم ماہر زبان دہ کودم کتاب گفتہ کہ فقط phonology بنیاد یک زبان استہ یا جور شودہ میتنہ — معلوم نشود۔ اگر موشود خوب بود مگر نشود۔
دہ خدمت ازونا گفتہ شونہ کہ phonology فقط یک جز زبان استہ۔ کسائیکہ وقتیکہ دہ بارے زبان گپ میزنہ اونا باید بوفامہ کہ زبان فقط دہ بلے phonology ایستہ نیہ۔ ہر زبان بلے ہفت بنیاد کہ دہ نامِ phonetics, phonology, graphemes, morphology, syntax, semantics, and pragmatics استہ — ایستہ استہ۔
ای ہفت بنیاد یک زبان رہ تشکیل میدیہ یا جور مونہ۔ اگر مو یک جُز یا علم ازی رہ از بنیاد شی خارج کنی، یک زبان زیرِ سوال قرار میگرہ کجا کہ شش جز شی بور کنی۔
افرادای کہ فقط بلے یک phonology تکیہ کدہ آزرہ گی زبان یا حروف تہجی جور مونہ از اونا گزارش استہ کہ اونا کم بیخانہ یا از یگو خانندہ آدم کہ اونا از یگو خوب یونیورسٹی زبان رہ خاندہ باشہ پرسان کنہ۔ زبان شناسی فقط کارِ زبان شناسا استہ بخاطریکہ اونا ساخت و بافتِ زبان رہ خبر درہ و موفامہ کہ زبان چیز استہ، چتور جور موشنہ و باید کودم بنیادی نکات یا پوائنٹ رہ دہ فکر بیگرہ۔
کسائیکہ موگیہ کہ آزرہ گی زبان ث، ح، ص، ض، ط، ظ، ع یا ے حروف نہ درہ اونا از بنیادی اصولای phonetics و phonology خبر نیہ۔ اونا متاسفانہ از اہمیت، ساخت و بافت phoneme, grapheme and morphology ام خبر نیہ۔ اونا ای رہ ام خبر نہ درہ کہ ای سہ بنیادی نکتہ چتور دہ بین خو ہم آہنگ شودہ و یکجئ کار کدہ چتور یک بامعنٰی لفظ جور مونہ۔ مثلن، یک اوریجنل عربی لفظ محمد استہ کہ فعلن دہ بین آزرہ گی زبان عام استہ۔ از نظر phoneme ای باید /م/ /ح/ /م/ /د/ خاندہ شونہ و از نظر grapheme ای باید محمد نوشتہ شونہ و از نظر morpheme محمد باید یک مکمل معنٰی بیدیہ۔ اگر مو حرف /ح/ رہ نوشتہ نکنی۔ بعض ای باید ممد نوشتہ شونہ کہ ای لفظ اید معنٰی نہ درہ و اگر لفظ مکمل معنٰی نہ دد از نظر زبان او لفظ غلط گوفتہ موشنہ۔
دوم، ہر لفظ از خود خو یک معنی، تقدس و تاریخی بیک گراونڈ درہ۔ امی برادرا موگیہ کہ مو ای رقم آزرہ گی رہ شاملِ نصابِ سکول مونی۔ اگر اونا محمد رہ ممد، علی رہ الی، عیسٰی رہ ایسٰی و حسین رہ اوسین نوشتہ کنہ۔ آیا اونا خبر درہ کہ دہ یک مذہبی قبائلی سیٹ اپ از الفاظای ازونا خاہد چی ری ایکشن بایہ۔ دہ ای بابت ما زیاد نموگوم۔
پنج سال پیش ما قد ازی برارا گپ ذدوم کہ از برای خدا بورین بیخانین، بوفامین کہ زبان چی استہ مگر برارا تابالی مینے امزو یک موزے خو استہ کہ پنج سال پیش بود۔
ما خبر دروم کہ بیشتر مردم آزرہ غوُوج ح، ص، ض، ط، ظ، ع نموگیہ۔ ما اینا رہ پنج سال پیش مفت مشورہ ددہ بودوم کہ ای حرفا رہ بال نکین — اگر بال کدین مینے آزرہ گی زبان یک بلوگ ٹیکنیکل خرابیا پیدا موشنہ — مگر گوش نکد۔
اینالی ام مشورہ ای استہ کہ ای تمام حرفا دہ نوشتے آزرہ گی زبان باید باشہ۔ البتہ گوفتوی شی کم سافٹ شونہ۔ مثلِ کہ دہ زبان انگلیسی سائلنٹ لیٹرز و ڈراپ سیلیبلز استہ۔ حلوہ رہ قد /ح/ نوشتہ مونی، البتہ خاندوی شی الوہ میخانی۔ عین اموتر علی رہ قد /ع/ نوشتہ مونی، خاندوی شی اَلی میخانی۔
مو باید تسلیم کنی کہ یک بلوگ زبانہا مثلن فارسی، عربی، اردو، انگریزی، ترکی و منگولی جُزِ زبان آزرہ گی جور شودہ و رسم و الخط رہ ام مو از عربی زبان گرفتے۔ اگر رسم الخط مو عربی نموبود کس ام اعتراض نموکد کہ مو کودم لفظ رہ چی رقم نوشتہ یا میخانی۔ آلی وقتیکہ عربی استہ و مردم ام ازی لفظا آشنا استہ مو باید کم مراعات کنی۔
اگر زبان فقط دہ بنیاد آواز موبود ایمروز دہ یوکے نوزدہ رقم انگلش موبود۔ کسائیکہ دہ اینجی زندگی مونہ اونا خبر درہ کہ انگلشِ نارتھ رہ ساوتھ نموفامہ۔ انگلشِ ایسٹ رہ ویسٹ نموفامہ۔ نوشتے شی یک رقم استہ مگر گفتوی شی رقم رقم استہ۔ چند سال پیش، ما طرفای نارتھ ایسٹ یوکے زندگی موکدوم او منطقہ رہ ڈراپ ٹی ایریہ موگہ۔ اکثر مردم دہ بین لفظای خو حرف ٹی نموگیہ۔ مثلن، از جای واٹر اونا واعہ موگیہ۔ از جای بَٹر اونا بَعہ، از جای باٹل اونا باعل و از جای potato اونا po-a-o (پو اے او) موگیہ۔ Tr رہ اونا Ch میخانہ۔ مثلن از جای try اونا chry (چرای) موگیہ۔ train رہ chrain (چرین) و tray رہ chray (چرے) موگیہ۔ خلاصہ، ہر منطقہ دہ مختلف آوازا انگلش موگیہ مگہ نوشتے شی یک رقم استہ۔
افسوس مہ دہ ازی مایہ کہ برارای بروری حسین علی یوسفی رہ یک قسم بابای آزرہ گی فکر مونہ مگہ ما یقین دروم کہ یک ازونا ام کتاب یوسفی رہ کہ دہ نام ہزارہ گی ضرب المثال و محاورات استہ خاندہ باشہ چراکہ یوسفی او تمام حروفا رہ دہ کتاب خو استعمال کدہ کہ اینا بور کدہ۔
اینالی ام کسائیکہ خود خو ماہر زبان میگرہ اونا باید ماسٹرز یا پی ایچ ڈی ریسرچ پیپرز یا تھیسس خو اوّل دہ شکلِ یگو کتاب دہ مئیدان بئیرہ، بعد ازو بوگیہ کہ ما زبان موفاموم یا ما زبان رہ خبر دروم۔ ای بازی بچہا نیہ۔

Leave a Reply

Your email address will not be published.

What is 12 + 3 ?
Please leave these two fields as-is:
IMPORTANT! To be able to proceed, you need to solve the following simple math (so we know that you are a human) :-)