Haqiqat/حقیقت

کس ام خبر نہ درہ کہ کائنات از کجا شروع شودہ و دہ کجا ختم موشنہ۔ کس ام خبر نہ درہ کہ کائنات چی قس کلان یا دراز استہ۔ کس ام خبر نہ درہ کہ دہ بین کائنات چند دانہ ستارہ استہ۔ چند سیارہ و چند گیلکسی یا نظامِ شمسی استہ؟
البتہ ای گپ رہ تمام خبر درہ کہ دہ کائنات ارب ہا ستارہ سیارہ و گیلکسی استہ و دہ بین یگ گیلکسی لاکھ ہا ستارہ و نظامِ شمسی استہ۔ مردم خبر درہ کہ زمین از مو جزِ یک نظامِ شمسی استہ و دہ ای نظام نو سیارہ دہ گردِ یک ستارہ یعنی روز حرکت مونہ۔
رقبے یک نظامِ شمسی دہ بین ارب ہا میل (مائل) استہ۔ شمو خودگون شوم ازی اندازہ کین کہ یک گیلکسی کہ دہ بین شی لاکھ ہا نظام شمسی باشہ اونا چی قدر کلان باشہ و خودِ کائنات کہ دہ بین شی ارب ہا گیلکسی باشہ اوناچی قدر کلان باشہ، بیخی از حساب تیرہ۔
دہ بین کائنات شاید ارب ہا دیگا گیلکسی ام باشہ کہ از روی زمین یا خلا (آسمان) قد طاقتور دوربین ہا ام دیدہ نموشہ۔
خلاصہ کائنات چی قدر کلان یا دراز استہ، کس ام خبر نہ درہ۔ سائنسدانہا موگیہ کہ کائنات ای قدر کلان استہ کہ نظام شمسی ازمو دہ مینے کائنات از یک دانے ریگ ام ریزہ استہ اگہ اینا از یک دانے ریگ ام ریزہ تر استہ 
و از بعض مناطقِ (جایای) کائنات نظامِ شمسی ازمو اید دیدہ نموشنہ۔ اگہ نظام شمسی ازمو دہ مینے کائنات از دانے ریگ ام ریزہ تر استہ، خو باید مو بوفامی کہ زمین از مو چی قدر ریزہ باشہ۔
سائنسدان ہا موگیہ کہ دہ مینے یک گیلکسی صدہا نظامِ شمسی تباہ موشنہ و جور موشنہ و دہ صحت گیلکسی اید فرق نموفتہ۔ یعنی مطلب شی ای استہ کہ اگہ موجودہ نظام شمسی یا زمین از مو تباہ شونہ دہ نظام کائنات شاید ایتر احساس شونہ کہ دہ یگو جای یگو ریزگگ پٹاخی پارہ شودہ۔
مقصدِ گپ ای استہ کہ زمین یا نظام شمسی از مو دہ مینے کائنات اید اہمیت یا حیثیت نہ درہ۔ ای تباہ موشنہ یا مومنہ بلے کائنات اید فرق نیہ۔ اگہ امروز یا صوبا تباہ نشود چند کروڈ سال بعد خودبخود تباہ موشنہ۔
دہ ای گپ تمام سائنسدان ہا متفق استہ کہ زمین یا نظام شمسی از مو دہ مینے کائنات اید اہمیت یا حیثیت نہ درہ مگہ متاسفانہ دہ روی زمین آدما زیاد استہ کہ خودگون خو کلان شخصیت و صاحب حیثیت میگرہ۔ اونا ایتر احساس مونہ مثلیکہ سیسٹم کائنات از مرضی ازونا چکر موخرہ و از مردم توقع مونہ کہ اونا ام باید تابع ازونا باشہ۔ اونا فکر مونہ کہ اگہ مردم بلے فکر ازونا عمل نکنہ اونا در بدر موشنہ۔
 تیت پرک موشنہ۔ تباہ و برباد موشنہ۔ زمین دو چک موشنہ۔ آسمان پارہ پارہ موشنہ۔ بے راہ روی زیاد موشنہ۔ اخلاقیات تباہ موشنہ۔ خلاصہ دنیا اولٹہ پولٹہ موشنہ۔
ہزار ہا سال پیش اونا کہ خودگون خو کلہ یا شخصیت میگرفت اونا ام دہ امی فکر بود کہ اگہ اونا نموبود قیامت موشود۔ امروز مو مینگرنی کہ دہ غیر موجودگی ازونا ام دنیا پیش رئیہ – یگو آفت یا قیامت نمدہ۔
افرادای کہ خود خو شخصیت میگرہ اونا باید بوفامہ کہ از فکرای ازونا اید کار نموشہ۔ انسانہا امیتر دہ سر خو خوردہ، تاہ پریدہ، شیشتہ، ایستہ شودہ و دویدہ پیش رفتہ۔ یگو کم زود از دنیا مورہ یگو کم دیر۔ خوب خوب تہذیبا تای پای شود۔ کلان کلان طاقتور قوتا یا سیسٹم ختم شود یا ختم شودہ رئیہ۔ یگو قوم، قبیلہ، طاقت، فکر، فرہنگ، مذہب، زبان یا سیسٹم برای ہمیشہ نیہ۔ کوہنہ سیسٹم دہ وقت خو ختم موشنہ و نو سیسٹم دہ مئیدان مایہ۔ امکان درہ یگو سیسٹم دہ یگو منطقہ کم وقت بیگرہ مگہ اونا آہستہ آہستہ ختم موشنہ۔ نو فکرا و ایجادات دہ مئیدان مایہ۔ رای ازونا رہ کس ام روک نمیتنہ۔ افرادا شاید کوشش کنہ مگہ چند سال بعد نفرای نو قد زندگی نو پیش مایہ و کوہنہ فکرا و اخلاقیات رہ تای پای کدہ زندگی رہ پیش موبرہ۔
ای یک حقیقت استہ۔ ہمیشہ امیتر شودہ و آئندہ ام موشنہ۔ یگو اتفاق مونہ یا نہ – رای بہتر تبدیلی رہ کس ام روک نمیتنہ بخاطریکہ زندگی خود شی دہ شرائطِ از خود خو زندگی رہ پیش موبرہ۔

Leave a Reply

Your email address will not be published.

What is 9 + 15 ?
Please leave these two fields as-is:
IMPORTANT! To be able to proceed, you need to solve the following simple math (so we know that you are a human) :-)