Adam-e Khub/ آدمِ خوب


خود خو از دیگا بہتر یا خوب تر فکر کدو یک زہنیت استہ کہ خوب خوب آدما رہ چمای شی کور کدہ و دماغ (فکر) شی لنگ کدہ۔ ما خوب استوم یک مرض استہ کہ صحت مند نفرا رہ ناجور کدہ۔ کسائیکہ دہ ای مرض مبتلا استہ اونا ہمیشہ دہ یک فکر استہ کہ اونا بسیار آدمِ آگاہ، اوشیار ، خانندہ و خوش اخلاق استہ۔ اونا باور درہ کہ اونا ہر چیز رہ موفامہ۔ از ہر چیز خبر دره. ہر سوال رہ جواب شی خبر درہ۔ اونا دہ یک فکر استہ کہ بجوز خودگون شی دیگا تمام احمق، بے عقل، بے ہنر، بدنمنہ و بد اخلاق استہ۔ برای ازی کہ خود خو رہ خوب بوگیہ اونا دیگا رہ بد موگیہ۔ اونا ہمیشہ خواہش درہ کہ ہر آدم گپ ازونا رہ گوش کنہ و اونا رہ تعریف کنہ کسائیکہ تعریف مونہ اونا رہ خوب و کسائیکہ نمونہ اونا رہ بد موگیہ۔ ای رقم آدما ہمیشہ خود خو یک کلان شخصیت فکر مونہ۔ ہمیشہ دہ حالتِ پرٹوکول استہ۔ از ہر کس خواہش درہ کہ اونا رہ عزت کنہ۔ بظاہر خوش اخلاق معلوم موشنہ مگہ نفرت ، تعصب و خود پسندی دہ مینے خون ازینا غرق استہ۔
مثلن، آدمای مذہبی ہمیشہ خودگون خو رہ خوب انسان فکر مونہ۔ اونا یقین درہ کہ اونا از تمام بہتر انسان استہ۔ اونا مذہب رہ خوش درہ مگہ فقط مذہب از خود خو۔ فرقہ رہ دوست درہ مگہ فقط فرقے از خود خو۔ نماز رہ خوش درہ مگہ فقط طریقے نماز از خود خو۔ برای ازی کہ مذہب یا فرقے از خود خو خوب بوگیہ اونا دیگا مذاہب یا فرقہ ہا رہ بد موگیہ۔ اگہ از بد گفتو ام دل شی قرار نگرفت توہین مونہ۔ اگہ از توہین ام دل شی قرار نگرفت اونا رہ کافر موگیہ۔ اگہ از کافر گفتو ام دل شی قرار نگرفت اونا رہ موکشہ۔ اگہ از کشتو ام دل شی قرار نگرفت قد خود خو قاتی قاتی اونا رہ ام ‘شہید’ مونہ۔
ای مرض فقط دہ بینِ مذہبیون نیہ ای دہ مینے ہر او آدم استہ کہ اونا خودگون خو از دیگا خوب تر و بہتر فکر مونہ۔ مثلن، وقتیکہ آدم یگو پاکستانی ٹی وی پروگرام بلخصوص ٹاک شو یا سرکاری تقریب توخ مونہ آدم مینگرنہ کہ بعض آدما برای ازی کہ خود خو رہ خوب یا وفادار پاکستانی نشان بیدیہ اونا ہمیشہ ہندوستان رہ بد موگیہ۔ عین اموتر یک خوب ہندوستانی ام از پاکستان نفرت مونہ۔ مو مینگرنی کہ یک خوب ایرانی ام از سعودی نفرت مونہ۔ یک خوب سُنی مذہب ام از شیعہ نفرت مونہ۔یک خوب سیاسی کارکن ام از دیگا سیاسی ورکرا نفرت مونہ۔ خلاصہ امی نفرت از دیستِ آدمای ‘خوب’ یعنی از بال امدہ رئیہ و مسلسل دہ تاہ منتقل شودہ رئیہ۔
غئیدیکہ مو جامعہ از خود خو توخ مونی آدمای کہ خود خو رہ خوب موگیہ متاسفانہ دہ ہر کوچہ و آغل دہ مختلف نام ہا و شکل ہا دیدہ موشنہ و برای شخصی مقاصد خو کاروبارِ نفرت و تعصب رہ دہ ہر شعبے زندگی پیش بوردہ رئیہ و بے چارہ معصوم مردما رہ تقسیم در تقسیم کدہ رئیہ۔
دہ ای روزا، مو مینگرنی کہ حرارتِ نفرت امند امند زیاد شودہ رئیہ بخاطیکہ دہ پاکستان بلخصوص علمدار روڑ کوئٹہ انتخابات نزدیک شودہ رئیہ و افرادای کہ خود خو رہ بہتر موگیہ اونا از خانای خو آہستہ آہستہ برو بور شودہ رئیہ تا کاروبارِ نفرت، تعصب و تقسیم خوب گرم بیلہ۔
شمو یقین کین کہ امی آدمای ‘خوب’ کہ خود خو رہ از دیگا بہتر موگیہ اینا دنیا رہ گو در گو کدہ و زندگی رہ برای مردم تنگ، تاریک و تلخ کدہ۔ شمو باور کین دہ امی روزا امو قس از آدمای بد ترس نموخروم کہ از آدمای ‘خوب’ ترس موخروم۔
خلاصہ، خیال خو بیگرین۔ انتخابات نزدیک امدہ رئیہ۔ نفرای ‘خوب’ ہوم ورک خو کدہ۔ گونیای نفرت فعلن دان شی بند استہ البتہ خواہد زود واز شود۔ مقصدِ گپ ای استہ کہ از آدمای ‘خوب’ کم اوشیار باشین۔

Leave a Reply

Your email address will not be published.

What is 14 + 5 ?
Please leave these two fields as-is:
IMPORTANT! To be able to proceed, you need to solve the following simple math (so we know that you are a human) :-)