Brian & Stomach/زہن و ک‍ورہ

چند روز پیش کم کورہ درد بودوم خاتو صایب گفت کہ ما شاید یگو دیر مندہ چیز خوردہ باشوم ازو خاطر کورہ درد شودوم۔ کلو فکر کدوم مگہ دہ یاد مہ نماد کہ چیز خوردہ بودوم البتہ گپ ای نیہ کہ ما چیز خوردہ بودوم گپ ای استہ کہ اگہ فرضِ محال ما یگو دیر مندہ چیز خوردہ بودوم چرا کورہ درد شودوم۔ چرا کورہ ری ایکشن نشان دد؟ چرا واویلای شی بور شد؟
وقتیکہ مو زہن رہ توخ مونی اونا کورہ وری نالہ نمونہ اونا دہ غم ازی نیہ کہ آیا ای فکر دیرمندہ استہ یا کوہنہ – یک ہفتنہ استہ یا ہزار سالہ – راس استہ یا دورغ – اید دہ فکر شی نیہ اَر چی کہ دہ گیر شی اماد قبول مونہ۔

امروزنہ سوال یا گپ ام امی استہ کہ کورہ چرا دیرمندہ چیزا رہ قبول نمونہ و زہن چرا قبول مونہ۔

ما دہ تمام زندگی خو تابالی یگو آدم رہ نہ دیدوم و نہ شنیدوم کہ اونا از فکرای دیرمندہ سر درد شودہ باشہ مگہ نفرا رہ زیاد دیدوم و شنیدوم کہ اونا از خوراکای دیرمندہ کورہ درد یا ناجور شودہ۔ اگہ آدم از خوراکای دیرمندہ کورہ درد موشنہ اونا باید از فکرای دیرمندہ ام سردرد شونہ مگہ نموشہ۔ چرا نموشہ؟
بعض مردم موگیہ کہ کورہ از زہن کدہ زیاد حساس یا امکان درہ اوشیار تر استہ – ما صد فیصد خبر ندروم – البتہ امکان درہ۔
مثلن، کورہ برای از خود خو یک معیار ایشتہ۔ اونا ہمیشہ خوراکای تازہ و صحت مند میخایہ – دیر مندہ یا مضرِ صحت چیزا رہ خوش ندرہ یا قبول نمونہ۔ اگہ یگو نفر سر زوری کنہ کورہ شکایت شی دہ شکل کورہ دردی شروع موشنہ۔ شمو یقین کین، کورہ آدم رہ دہ شکلِ درد، پیچیش یا قبض وارننگ ام میدیہ کہ آدم باید اونا رہ خیال شی بیگرہ تا ناجور نشنہ۔
مگہ سوال ای استہ کہ زہن ام جزِ بدن استہ اونا چرا آدم رہ از فکرای کوہنہ، گنڈہ و پوسکہ زدہ وارننگ نمیدیہ۔ باید بیدیہ – مگہ نمیدیہ۔
بیشتر مردم دہ ای فکر استہ کہ زہن از کورہ کدہ اوشیار تر استہ – اگہ اوشیار استہ زہن چرا فکرای خراب رہ قبول مونہ؟ چرا آدمای خراب رہ خوب نشان میدیہ؟ چرا فکرای غلط رہ درست نشان میدیہ؟ چرا مردم رہ تای کلے احمق میشندنہ؟ چرا مردمای فراڈ رہ مقدس نشان میدیہ؟ چرا مردمای احمق رہ باور میدیہ کہ اونا اوشیار و عاقل استہ؟ چرا احمق رہ رہبر نشان میدیہ؟ چرا احمقانہ فعل رہ مقدس نشان میدیہ؟ چرا ضالم رہ دیست شی نمیگرہ؟ چرا و چرا۔۔۔۔؟

Leave a Reply

Your email address will not be published.

What is 8 + 9 ?
Please leave these two fields as-is:
IMPORTANT! To be able to proceed, you need to solve the following simple math (so we know that you are a human) :-)