Human/اشرف المخلوقات

“موگیہ کہ انسان اشرف المخلوقات استہ یعنی انسان از تمام مخلوقات، انس و جنس بہتر، برتر و مقدس استہ۔ تقریبن تمام مذاہب امی گپ رہ موگیہ۔ انسان برای ازی کہ زندہ بومنہ موگیہ حق درہ کہ حیوانا رہ بوکشہ گوشت شی بوخرہ و سودا کنہ۔ برای مختلف مقاصد خو درختا رہ قلم قچار کدہ استعمال کنہ یا دہ خانے خو در بیدیہ۔ دہ روی زمین اگہ یگو آلف، سوزی یا دانہ استہ اونا رہ برای وسیع تر مقاصد خو بوخرہ یا استعمال کنہ۔
ازو بعد ام اگہ انسان دل شی قرار نگرہ، انسان و حیوان رہ دہ نامِ مذہب بوکشہ۔ از زیرِ زمین معدنیات رہ بور کنہ و روی آسمان رہ از دوود سیاہ کنہ۔
خلاصہ انسان کہ خود خو مقدس موگیہ از خاطرِ شخصی یا اجتماعی کارای خو متاسفانہ نظامِ فطرت رہ مسلسل تباہ کدہ رئیہ۔ عمرِ زمین تقریبن 4.5 بلین سال استہ۔ ارکیالوجسٹ موگیہ کہ انسان رہ تقریبن دو لک سال شدہ کہ دہ روی زمین امدہ۔
دو لک سال پیش، تمام زمین دہ بہترین نظام خو بود۔ غئیدیکہ انسان دہ روی زمین اماد خرابیا پیدا شد و مسلسل زیاد شدہ رئیہ۔ زیر زمین آو کم شدہ رئیہ۔ دریا ہا خشک شدہ رئیہ۔ گلیشئیرز ایگریز اَو شدہ رئیہ۔ فضائ آلودگی زیاد شدہ رئیہ۔ ناجوریا روز دہ روز زیاد شدہ رئیہ۔ درجہ حرارت زمین زیاد شدہ رئیہ۔ طوفان و سیلاب زیاد شدہ رئیہ۔ مقدارِ آکسیجن کم شدہ رئیہ۔ نفرت، ظلم و بے انصافی ام زیاد شدہ رئیہ- خلاصہ انسان نظام قدرت رہ دہ تیزی تباہ کدہ رئیہ۔
جدید سائنس موگیہ کہ اگہ انسان از روی زمین ختم شونہ، زمین و نظامِ فطرت دوبارہ دہ زودی طرفِ خوبی خو مورہ و اگہ اوخلئي و مگس از روی زمین ختم شونہ نظامِ فطرت بلخصوص ایکو سسٹم موگیہ کہ زودتر خراب موشنہ۔ آدم شاید باور نکنہ کہ فائدای مگس و اوخلئي از اشرف المخلوقات بیشتر استہ ۔۔۔”
اونا دمست گفتہ رئیی بود و ما حیران شدہ رئی بودوم کہ اینا چی فالتو فالتو گفتہ رئیہ۔ ایتر چتور موشنہ اید امکان نہ درہ۔ انسان اشرف المخلوقات استہ۔ مقدس استہ۔ نمائندے خدا استہ۔ انسان چتور نظام خدا رہ تباہ مونہ یا کدہ رئیہ۔ ای چتور شدہ میتنہ کہ اوخلئي و مگس بہتر از انسان استہ۔ ما یقین مہ نمایہ۔ اید باور نمیتنوم۔ تمام دروغ استہ۔ افواہ استہ۔ پورپگند استہ۔ لا حول ولا قوة ۔۔۔ لعنت بر کسائیکہ دروغ گفتہ و موگیہ۔

Leave a Reply

Your email address will not be published.

What is 9 + 7 ?
Please leave these two fields as-is:
IMPORTANT! To be able to proceed, you need to solve the following simple math (so we know that you are a human) :-)