Do Waqiay/دو واقعہ


زمانای نوجوانی بود بخیالم نہم میخاندوم۔ ہفتم یا ہشتم محرم بود۔ بیگاہ، ساعتای شش یا ہفت بود کم تاریک شدہ رئی بود۔ بابے مہ خدا بیامورزہ از خاطرِ یگو کار مرہ مشین روڈ کوئٹہ رئی کد۔ زود سائیکل خو گرفتوم۔ از خانہ برو امادوم۔ سائیکل چلاندہ بلے علمدار روڈ امادوم۔ آوازای نوحہ و مجلس از چند دکانا و سبیلہا میماد مگہ غئیدیکہ نزدیکِ جامعہ امام صادق رسیدوم آوازای نوحہ و ماتم زیاد شدہ رئی بود بخاطریکہ آوازای نوحہ و ماتم از سپیکرای مختلف امام بارہ گاہ بلخصوص امام بارگاہِ سیدآباد، امام بارہ گاہِ بلتستانیا و امام بارہ گاہِ نچاری میماد۔ دہ علمدار روڈ ایتر احساس موشد کہ از ار گوشے آسمان آوازِ نوحہ و ماتم میماد یا مثلیکہ تمام دنیا غم گرفتہ بود۔ وقتیکہ کم تاہ رفتوم آوازای نوحہ و ماتم از امام بارگاہِ گلگتیا، قندھاریا و پنجابیا ام میماد۔
سائیکل چلاندہ پیش رفتوم۔ آوازای نوحہ و ماتم دہ ای دوران آہستہ آہستہ کم شدہ رئی بود۔ از رای قائدآباد تھانہ دہ مینے طوغی روڈ داخل شدوم۔ نزدیکِ ڈیلائٹ سینما وقتیکہ رسیدوم امیتر احساس موشد کہ دہ گوشای مہ پاکستانی و انڈین گانا مایہ۔ اید باور مہ نمیماد دوبارہ گوشای خو دَوندوم کہ شاید ما غلط میشنوُوم مگہ غلط نہ بود ار چی کہ پیش مورافتوم آوازای گانا زیاد شدہ رئی بود۔ یک لحظہ وری حیران شدوم کہ خدایہ چی قصہ یہ۔ دہ اونجی نوحہ و ماتم دہ اینجی گانا۔ بینِ علمدار روڈ و طوغی روڈ دہ مشکل یگو دو منٹ پیدل راہ استہ مگہ فرق زیاد دیدہ موشد۔ حیران بودوم کہ یعنی چی؟ ار دو منطقہ خودگون خو مسلمان موگیہ مگہ مینے فکرای ازینا زمین و آسمان فرق بود۔ اینا درستہ یا مو؟ سوالہا بود کہ دہ زہن مہ جور شدہ رئی بود۔ سر مہ مثلِ پہیے سائیکل مہ وری چکر خوردہ رئی بود۔ کلو کوشش کدوم کہ رای سوالہا رہ روک کنوم مگہ نموشد – ایگریز امدہ رئی بود و نو سوالہا خلق کدہ رئی بود کہ امی تمام گپا خدانخواستہ فقط فکری خوش فہمی مردم نہ باشہ۔
دہ امی فکرا بودوم کہ مشین روڈ رسیدوم دہ اونجی ام یگو آوازِ نوحہ یا ماتم نہ بود۔ اید خوش مہ نماد۔ از دکان زود سودا رہ گرفتوم بلے سائیکل شیشتوم – تیز طرف پولیس لائن رافتوم تا ازو راہ طرفِ خانہ بوروم۔ از رای پلِ عجب خان بلے میجر محمد علی شہید روڈ امادوم البتہ تمام راہ فکر کدوم کہ نظامِ فطرت آیا دہ مطابقِ خواہشا یا فکرای مردم استہ – یا نہ – دہ مطابقِ اصولای از خود خو استہ۔ ای او سوال بود کہ تا چند سال مرہ پریشان کد۔
ازو واقعہ چند سال بعد، یک روز خانہ شیشتہ بودوم شارٹ سٹوریای ٹالسٹای رہ خاندہ رئی بودوم۔ یک سٹوری دہ نامِ (لیٹل گرلز وائزر دَن مین) خوش مہ اماد – فکر کدوم کہ باید دہ زبان اردو برای روزنامہ جنگ اخبار کوئٹہ ترجمعہ شونہ لہٰزا ترجمعہ کدو شروع کدوم۔ آخری لائنِ سٹوری بلے یک آیتِ انجیل ختم شدہ بود۔ لفظی ترجمے شی آسان بود مگہ ما میخاستوم کہ امو خودِ آیت رہ دہ زبانِ اردو پیدا کنوم۔ بلےانٹرنیٹ توخ کدوم مگہ پیدا نشد۔ قد یک رفیق خو صلاح کدوم اونا مشورہ دد کہ دہ کباڈی روڈ “بستی” بوروم دہ اونجی از یگو عیسائ یا پادری چرچ پرسان کنوم۔
مشورے شی معقول بود لہٰزا صوبائ شی بیگاہ از خانہ پیادہ رئی شدوم۔ از رای علمدار روڈ بلے حاجی قدم علی سٹریٹ امادوم ازونجی از رای لوڈی میدان بلے کباڑی روڈ رسیدوم۔ چند دکانای کباڈی رہ تیر کدوم. ده دیست راس یک کلان گیٹ بود مگہ واز بود۔ دورنِ بستی امادوم۔ یک نفر کنارے دیوال ایستہ بود ازونا خانے پادری رہ پرسان کدوم۔ اونا اول كم حيران شد مگه ازو بعد مرہ طرف خانے پادری بورد۔ دہ دانِ گلی (کوچہ) طرفِ یک خانہ اشارہ کدہ گفت ” وہ دائیں ہاتھ پہ آخری گھر پادری صاحب کا ہے۔”
“بہت شکریہ بھائ،” گفتہ قد ازونا خدا حافظی کدوم۔
آہستہ آہستہ طرف خانے پادری صاحب رافتوم غئیدیکہ نزدیکِ خانے شى رسیدوم دروازے شی ٹخ ٹخ کدوم۔ یک نوجوان تقریبن دہ عمرای ازمہ بود دروازہ رہ واز کد پیش اماد طرف ازمہ کم دراز توخ كد میخاست کہ پرسان کنہ مگہ ما فورن ازونا پرسان کدوم “پادری صاحب گھر پہ ہے؟”
اونا دوباره كم حيران شد مگه زود گفت “نہیں، گھر پہ نہیں ہے اس وقت وہ چرچ میں ہے،” ۔۔۔کم فکر کدہ اونا دوبارہ گفت “چلئے، میں آپ کو وہاں لے چلتا ہوں۔”
“بہت شکریہ بھائ،” گفتم۔
ار دوی مو طرف چرچ رئی شدی۔ کم تاریک شدہ رئی بود۔ نزدیکای ازان بود۔ چرچ دور نہ بود امونجی دہ مینے بستی بود از خانے پادرى چند قدم دور دہ دیگہ گلی بود۔ وقتیکہ نزدیکِ دروازے چرچ رسیدی مُلای اوغونو ازان ددو شروع کد۔ آوازِ ازان از مسجدِ عبدالله جان امدہ رئی بود۔ دہ ای دوران (مجل) اونا دروازے چرچ رہ امند پیش دھکا ددہ واس کد مگہ بموجرتیکہ دروازہ کم واز شد آوازِ پیانو، تبلہ و آرمونی یم برو اماد۔
“اس وقت سروس، ‘عبادت’ ہو رہی ہے،” اونا گفت۔
ما جواب نہ ددوم بخاطریکہ فکرای مہ طرفِ آوازِ پیانو و ازان بود و ار دوی شی دہ یک وقت امدہ رئی بود۔ ما حیران بودوم کہ خدایہ ای چی قصہ یہ۔ از یک طرف آوازِ ازان میماد از طرفِ دیگہ آوازِ موسیقی – ار دوی شی مذہبی عمل بود مگہ ضدِ یک دیگے خو بود۔ دہ امی فکرا بودوم کہ اونا طرف ازمہ اشارہ کد کہ درونِ چرچ بیا۔ امند امند پیش امادوم داخلِ چرچ زیاد نفرا نہ بود تمام ازونا دہ آوازِ موسیقی یگو چیز (حمد) خاندہ رئی بود۔ چند منٹ ایستہ شدہ انتظار کدوم. غئيديكه سروِس ختم شد اونا مرہ طرفِ پادری بورد۔
پادری صاحب يک دراز سفيد رنگ كالا مثلِ عبا ورى پوشيده بود. یک سرخ رنگ موفلر مثلِ یک ريزه باريك سکارف ورى يگو چيز از بلے اَر دو شانى شى تاه امده بلے كورے شى لكتاو بود. تقريبن دہ عمرای شست سالہ بود۔ رنگ شی کم سیاہ البتہ مویای سر شی سفید بود۔ بسیار دہ خوش اخلاقی قد ازمہ سلام دعا کدہ پرسان کد “ہاں بیٹا، کیا خدمت کرسکتا ہوں؟”
بعد ازو اونا بلے فرش شیشت مرہ ام اشارہ کد کہ بیشین تا دہ قد راسی گپ بوگی۔
آیتِ انجیل کہ دہ انگریزی زبان بود اونا رہ گفتم کہ ما دہ زبانِ اُردوی شی دکار دروم۔ اونا کم فکر کد ازو بعد فورن ایستاد شد طرف کنارے دیوال رافت دہ اونجی یک ریزہ شیلف بود دہ مینے شی چند کتابا ایشتہ بود – ازونجی یک کتاب گرفتہ دوبارہ طرف ازمہ اماد۔ کتاب رہ ورق ورق کدہ بلے یک صفحہ روک شد دہ غور خاندو شروع کد ازو بعد طرف ازمہ توخ کدہ گفت ” یہ دیکھو بیٹا، آپ کا آیت مقدس ڈھونڈ لیا۔”
کتاب رہ گرفتوم. آیت کہ دہ زبان اردو بود خاندوم خوش شدوم۔ “بہت شکریہ آپ کا،” گفتم۔
آيت ره فورن بلے كاغذ نوشته كدوم. كتاب ره واپس ددوم. ازو بعد اونا رہ گفتم کہ ما یک شارٹ سٹوری رہ دہ زبانِ اردو ترجمہ کدہ رئیوم۔ اونا خوش شد البتہ مثلِ ملاہای بیجرگہ وری اونا کوشش موکد کہ ما بايد عیسائ مذہب رہ بیخانوم تا یک بہتر انسان جور شنوم. ما بخاطريكه برای ازی مقصد نہ امدہ بودوم ازو خاطر گپای ازونا زیاد خوش مہ نماد۔ دہ دل خو فکر کدوم کہ مُلا مُلا استہ اینا گئی ام انسان نموشہ بخاطریکہ اینا ہمیشہ انسان و انسانیت رہ از نظرِ یک مخصوص مذہب توخ مونہ۔ ار کس کہ دہ دین یا فرقے ازونا استہ اونا انسان استہ کسائیکہ نیستہ اونا متاسفانہ نیہ۔
خلاصہ زود خدا حافظی کدہ از چرچ برو امادوم دوبارہ طرف خانہ رئی شدوم مگہ دہ دانِ راہ فکر مہ دوبارہ بلے اولنہ سوال رافت کہ مذہبی تضادات چرا زیاد استہ۔ وقتیکہ اینا خود گون خو دينِ فطرت موگیہ چرا ضدِ یک دیگے خو استہ؟ چرا اولٹے یک دیگے خو استہ؟ اگه اينا واقعن دينِ فطرت استه چرا اینا نظامِ فطرت وری قد یک دیگے خو بستہ (کنکٹڈ) نیہ۔ چرا یک دیگے خو کومک یا سپورٹ نمونہ۔ اگہ مو نظام فطرت رہ توخ کنی مو مینگرنی یا احساس مونی کہ تمام فطری عمل قد یک دیگے خو هم آهنگ استہ – یک دیگے خو سپورٹ مونہ کومک مونہ تا نظام فطرت پیش بوره۔
ده امى فکرا بودوم كه بلے علمدار روڈ رسيدوم۔ غئیدیکہ نزدیک جامعہ امام صادق رسیدوم امیتر احساس مونوم کہ یگو مرہ آواز ددہ رئیہ۔ طرف آواز توخ کدوم – مينگرنوم کہ دو سہ رفیقا ده ديگه طرفِ سرک بلے تڑے تنظیم میڈیکل سٹور شیشتہ بود مرہ آواز ددہ رئی بود۔ سرک ره تیر (كراس) كده زود طرف ازونا رافتوم۔
“چیز قد از خود خو گفتہ رئی بودی، زوی؟” یک رفیق مہ خنده كده پرسان کد۔
“مشکلات زیاد استہ، زوی،” قد رفیقا چمبہ ددہ جواب ددوم۔
“ایلہ کو مشکل ہا رہ، بیشی چای بوخر ۔۔۔چای تمام مشکل ہا رہ حل مونہ۔” رفيق مه گفت.
“آ ولہ، امی گپ رہ خو راس گوفتی،” بلے تڑہ پہلوی رفیق خو شیشتہ گفتوم۔
رفیق مہ دہ ای دوران فورن مینے كوپ (پیالہ) چای انداخت۔ پہلوی چای یک ریزہ قندانی بورہ بود – مینے قندانی یک ریزہ قاشوق ام بود۔ رفيق مه تقریبن یک نم قاشوق بورہ مینے چای انداخت کم شور دد – مینگرنوم کہ بورہ گم شد مثلیکہ اید نہ بود۔ ازو بعد چای رہ نزدیک مہ ایشت۔ از مینے كوپ (پياله) گرم گرم تفت بور شدہ رئی بود مگہ كم بال رفته زود گم موشد۔ دیست خو پیش کدہ پیالہ رہ گرفتوم چائ کم گرم بود پوف کدہ یک قورد خوردوم۔ چای گرم گرم شدہ مزہ ددہ از حلق مہ تاہ رفتہ دہ مینے کورے مہ یگو جای گم شد. اید فاميده نشد کہ دہ کجا شد۔ اموتر گم شد مثليکہ بورہ مینے چای و تفت بال دہ مینے ہوا۔ بخاطریکہ تمام ازينا جزِ فطرت بود ازو خاطر زود ده بين يک ديگے خو ضم شد. يک ديگے خو فورن قبول كد. البتہ وقتیکہ مو مختلف مذاہب رہ توخ مونی آدم حیران موشنہ كه اینا چرا يک ديگے خو قبول نمونه۔ خود گون خو دينِ فطرت موگيه مقصد خو یک موگيه مگہ ضدِ یک دیگے خو استہ۔ چای زود جزِ بدن جور موشنہ مگہ اینا متاسفانه نموشنه۔
“بخیالم کہ بسم دہ یگو فکرا رافتی؟” رفیق مہ طرف مه توخ كده پرسان کد۔
“نہ، دم ست چای رہ انجوای كده رئيوم،” گفتم مگہ زود دوبارہ فکر کدوم کہ ای کاش مذاہب ام مثل چای وری موبود کہ تمام انسانہا او رہ انجوای موکد مگہ متاسفانہ نمونہ – بجوز پیراکارای شی۔

Little girls wiser than men by Tolstoy
‘Except ye turn, and become as little children, ye shall in no wiser enter into the kingdom of heaven.’

Leave a Reply

Your email address will not be published.

What is 14 + 8 ?
Please leave these two fields as-is:
IMPORTANT! To be able to proceed, you need to solve the following simple math (so we know that you are a human) :-)