Nazar/نذر

شیر برنج“سلام و عليكم،” نانے كرار درونِ اَولى خانے اَمسايہ داخل شده گفت و ده خوش اخلاقى پرسان كد.”اَو ، يگو خانہ استہ؟”
“واعليكم سلام،” فاطمہ از دروازه كم دور تاى اَوچہ ده يگ بغل شيشتہ كاسہ پيلہ موشوشت گفت.”صبر خالہ، آلى نانے مہ مايہ.”
“نانئي!” فاطمہ آوازِ بلند نانے خو كوى كد.
نانے فاطمہ از خانہ بورو اماد و سميدم طرفِ نانے كرار رافت و گفت “اَئیی خوار سلام، بوبخشين خانہ ره جارو موكدوم.”
“خدا بوبخشہ خوار، اينا براى شمو نذر آوُوردوم،” نانے كرار قابِ شير برنج ره دده گفت.
“خدا نذراى شمو ره قبول كنہ، خوار،” نانے فاطمہ قابِ شير برنج ره گرفتہ گفت.
“جور باشين خوار. خدا شمو ره ايمان بيديہ،” نانے كرار گفت.
“خير استہ خوار؟ نذر براى چى كدين؟ نہ ماى محرم استہ، نہ رجب نہ شعبان؟” نانے فاطمہ پرسان كد.
“بس خوار اموتر كدوم …،” نانے كرار گفتنى بود مگہ نہ گفت.

“خدا شمو ره نگاه كنہ….بعضم خوار …؟” نانے فاطمہ دوباره پرسان كد.
“نہ يگو خاص وجہ نيہ. ميخاستوم بلے كرار – بچيمہ – يگو خوب نوكرى پيدا شونہ،” نانے كرار گفت.
“يگو جاى درخواست دده؟” نانے فاطمہ دوباره پرسان كد.
“نہ خوار، تابالى نہ دده. مہ گفتوم كہ خدا راى روزى شى زود واز كنہ،” نانے كرار جواب دد.
“انشاالله بلے كرار نوكرى ضرور پيدا موشنہ البتہ خوار مہ شنيدوم كہ امام بارے پاى كوه بلے نوكرى بسيار خوب استہ. ده اونجى نذر بوردے يا نہ؟” نانے فاطمہ مشوره دده پرسان كد.
” اَئیی خوار ، مہ شنيدوم كہ اُو بلے بار رفتو خوب استہ،” نانے كرار گفت.
“نہ خوار، بلے بار رفتو روزے ملا عبدل خوب استہ. اونا ايترمصروف استہ كہ ايد وقت نہ دره،” نانے فاطمہ گفت.
“آن، راس موگين. اى گپ ره نانے ذكيہ ام گفتہ بود،” نانے كرار گفت و بعدن پرسان كد “اَئیی خوار، بلے آرسى كودم شى خوب استہ؟”
“آرسى از كى استہ، خوار؟” نانے فاطمہ پرسان كد.
“اميتر پرسان كدنى بودوم،” نانے کرار گفت.
“بعضم خوار؟” نانے فاطمہ دوبارہ پرسان كد.
“اَمى بلے كرار كم فكر كده رئيوم،” نانے كرار گفت.
“بلے آرسى شنيدوم كہ دو سہ امام باره خوب استہ. تو ده تمام شى نذر بوبر. خوار ، تو خبر درے؟ …” نانے فاطمہ گپ زدنی بود مگہ فاطمہ دختر شی كہ تائ اَوچہ نزديكِ دروازے خانہ كاسہ پيلہ موشوشت، نزديكِ نانے خو اماد گپ شى مونٹى (كٹ) كدہ گفت. “خالہ سلام.”
“واعليكم سلام،” نانے کرار جواب دد۔ “چتور استین؟ خوبین؟ اسکول شوم خوب استہ؟”
“شکر نانے کرار، سکول خوب استہ. شمو چتور استین؟ فاطمہ جواب دد و بعدن گفت “توخ خالہ، دورے نانے مہ نكنين. نانے مہ فالتو فالتو گپا زياد موگہ. از هر كس كہ يگو چيز ميشنوه ديگا ره موگيہ.”
“نہ، نانے تو بسيار اوشيار استہ. يگ بلوگ گپا ره موفامہ،” نانے كرار گفت.
“اُو خو درستہ مگہ بعضِ مردما امام باره ره بيخى مسخره جور كده. امام باره بلے عبادت استہ نہ بلے بار رفتو، روزگار و آرسى. خبر نہ دروم خاتونو از كجا اى گپا ره ميشنوه يا جور مونہ،” فاطمہ كم ده قار گفت و دوباره گفت “مو ده اسكول تمام روز شاگردا ره موگئي كہ بلے از خود خو باور پيدا كين، بلے تعليم و هنر خو يقين كين. خدا هميشہ قد ازونا استہ كہ اونا محنت مونہ. خيرات مقصد شى كومك استہ و كومك بايد قد غر يبا شونہ…”
نانے کرار حیران بود کہ چیز بوگیہ۔ فاطمہ ایگریز گفتہ رئیی بود. آخر تنگ امدہ ده قار گفت “بيدى خوار، نذر مہ واپس بيدى. خدا چَپ كنہ آلينہ نسل ره.”
قابِ نذر ره از گيرى نانے فاطمہ واپس گرفتہ قد از خود خو بِڈ بِڈ كده از خانے ازونا برو بور شده گفت “ميرَس بيلہ اى تعليم ره. تعليم نشد بلا شد.”

توجہ: تمام ناما فرضی استہ. دہ یگو نفر تعلق نہ درہ. تشکر

Share Button