Abdul /عبدل

abdul

مسلمان خوب ام استہ بد ام. ايماندار ام استہ بے ايمان ام. عادل ام استہ ظالم ام. كيل ام استہ روست ام. خلاصہ قسم قسم استہ رنگ برنگ ، اولٹہ پولٹہ ،گڈ وَڈ.
اى گپ ره يگو قبول دره، يگو نہ مگہ عبدل اى گپا ره قبول نہ دره. اُو ايد قبول نمونہ کہ مسلمان بد، ظالم و بےايمان شده ميتنہ.
ہر چى کہ موگى مثال ميدى مگہ نہ، گوش نہ مونہ کہ نمونہ. آدم حيران موشہ کہ خدایا، اينا چرا اى قدر ساده استہ؟ چرا يگ ريزگگ گپ ره نموفامہ؟ خدا نخاستہ يگو اعصابى مشكل ام نہ دره. دو كلان كلان نورانى چما دره. کٹہ کٹہ مقدس گوشا دره. ريزه ام نیہ. کٹہ غڈم پس مرتيکہ یہ مگہ يگ چوقئي گپ ره نموفامہ، تعجب استہ.
ماشااللہ خاننده ام استہ. ده يگ كشورِ آزاد، مہذب، خاننده و خوشال زندگى مونہ مگہ از نظرِ فكرى ده قرن يازده يا دواذده زندگى مونہ. فاميده نموشہ کہ اونا ازى كشور يگو چيز ياد گرفتہ يا بايد ياد بيگره. از دان شى ہمیشہ بوى جہالت، فقر و پسماندگى مایہ. فقط مسلمان مرد ره انسان فكر مونہ. موگیہ کہ زن حيوان استہ و تمام مسلمان قط سر پئيچے خو ده بہشت موره.


گپاى عبدل آدم ره حيران مونہ مگہ خود شى حيران نہ موشہ. كس ام اعتراض نہ دره کہ مسلمان ده بہشت نموره مگہ عبدل بلے ہر كس و بلے ہر چيز اعتراض دره.
مثلن ايتر نخر اوتر بوخر. اينجى نشى اونجى بيشى. اى ره نگى اُو ره بوگى. خلاصہ يگو چيز نیہ کہ اونا اعتراض نہ دشتہ باشہ. از گشتو، شيشتو، گفتو، خوردو و توخ كدو گرفتہ تا بلے كار كدوى مردم اعتراض دره. موگیہ اى كار حلال استہ اُو كار حرام. يگو نام بيگر، اونا يگ نہ يگ اعتراض پيدا مونہ. اُو ہمیشہ دہ ای نظر بودہ و فعلن ام استہ کہ اونا برحق استہ۔ اونا راس موگیہ۔ تمام طریقہ کار ازونا درست استہ۔ دیگا دروغ موگیہ۔ فراڈ استہ۔ جاہل استہ۔ غلط فکر مونہ و نہ موفامہ۔
عبدل ميخایہ کہ ہر كس از اُو ورى باشہ. از اُو ورى فكر کنہ. از اُو ورى بيگشتہ، بيشیہ، بوگیہ، بوخره و توخ كنہ. اگہ از اُو ورى بود يا باشہ، اُو نفر ره بسيار خوش مونہ. دوست خو جور مونہ. ده خانے خو كوى مونہ. دعوت مونہ. نان ميدیہ. عزت ميدیہ. استقبالِ گرم مونہ. البتہ اگہ خدا نخاستہ از اُو ورى يگو نہ باشہ، از اونا دوور توتا مونہ. ده خلاف شى موگیہ. پوٹکی پوٹکی دَو ميزنہ. پس پوشتے شى گپ موگیہ. از جعلى فيس بوك اكاؤنٹس ده خلاف شى واہیات موگیہ. خلاصہ ده يگو جاى يگو موقع از ديست نہ ميدیہ کہ ده خلاف شى نگیہ.
رفيقاى شى موگیہ کہ عبدل محرم، نذر، روزہ، ماتم، مجلس (خاندن)، ملا، ايران، صيغہ، رنگِ سياه، شہادت، بينفٹ (الاؤنس) و شورواى گوشتِ گوفند قط ماس خوش دره.
آدم حيران استہ کہ عبدل ره چيتور بوفامندنہ کہ خداوند فقط مسلمان ره خلق نكده ديگہ انسانا ره ام خلق كده. بدونِ ايران ديگہ كشورا ام خوب استہ. زن ام انسان استہ. خوشى ام جزِ زندگى استہ۔ خداوند قسم قسم رنگا و خوراكا جور کدہ فقط شورواى گوشتِ گوفند و ماس جور نکدہ. تمام ازينا قابلِ قدر و احترام استہ.
اگہ زندگى صدخداى نخاستہ مثلى خاستِ عبدل ورى موبود آدم حيران موشد کہ خاہد چى رقم موبود. يگ رقم آدم، يگ رقم رنگ، يگ كشور، ہر روز ماتم، روزہ، مجلس و فقط يگ رقم خوراك – يقينن بےرونق، بےمزه ، بے رنگ، بےجرگہ، غیر فطری، بد نمود ، بدجيثل و بژغل موبود.
توجہ: عبدل فقط يگ فرضى نام استہ. ده يگو نفر تعلق نہ دره. تشكر