Middle Pass/ مڈل پاس

  • مڈل پاس

مڈل-پاسماشاالله خوب خانے كٹہ، پاک، صاف و روشن بود. نور بند و جلو ايرانى قالين ام روى خانہ آوار بود. بلے بخارى كٹہ كٹہ خوشنما عكساى فاميل ایشتہ بود. پالوى عكسا رنگا رنگ گلہا ده خوشنما گلدانيا بسيار خوب معلوم موشد. روى ديوال چند دانہ فوٹواى مقدسات بود. يگ طرفِ خانہ، كلان كلكين و روشن دان بود و ديگہ طرف يگ كلان ٹى وى بود. ده روى چت پنكہ ام بود. خلاصہ ہر آسائش زندگى موجود بود.
ده خانہ دو نفر شيشتہ بود. يگ طرفِ خانہ يگ باكل ده عمراى تقريبن ہفتاد سال ده كنارے ديوال شيشتہ تسبیہ كد ه رئی بود و روى بروى باكل ده ديگہ كنارے ديوال يگ نوتگ بچہ، على ده عمراى اژده يا نوزده سال شيشتہ بود۔ ہر دوچماى شى بلے موبائل بود ايگريز گيم بازى كده رئی بود.


دروازے خانہ بے بولغہ واز شد و يگ مرتيكہ داخلِ خانہ شد و سلام گفت. على ده ای مجل فورن موبائل ره تاى پاى خو پوٹ كد.
“واعليكم السلام،” باكل جواب دد.
“على بچيم چى كار كده رئی استے؟” بابے على پرسان كد.
“ہيج كار نہ نوم بابا. قط باكل گپ زده رئی یوم،” على طرف بابے خو توخ كده جواب دد.
“آفرين بچيمہ، باكل ره خيال شى بيگر،” بابے شى گفت و طرف باكل رافت “خوب بابئی جان، اجازه باشہ طرف كار رفتنى بودوم. على نوسے شوم امروز ده خانہ استہ. شمو قط ازى گپ شپ كنين و اگہ يگو كار بود على ره بوگين. مہ بخيالم بوروم كہ دير شد.”
“خوب بچيم، شمو پشت كار خو بورين. مہ قط نوسے خو گپ شپ مونوم،” باكل گفت.
“بيگاه كم گاتر خانہ مايوم. بسم انشاالله گپ شپ مونى،” اُو دست بابے خو ماخ كده بال شد و طرف على توخ كده گفت “باكل ره خيال شى بيل بسيار سالہا بعد امده.”
“آن بابئي، خوبہ شمو بےغم باشين،” على بابے خو تسلی دده خدا حافظى كد.
غئيديكہ بابے على از خانہ برو رافت على موبائل ره دوباره از تاى پاى خو بور كد و گيم بازى شروع كد.
باكل طرف نوسے خو توخ كد و گفت “على.”
على جواب نہ دد بخاطريكہ اُو ده بازى گرم بود. باكل كم ده آواز بلند گفت “او على!”
“آ باكل! چى گپہ؟” على ده بيزارى جواب دد۔ ہر دو چماى شى بلے موبائل بود.
“اَو بابا چند جماعت خاندے؟” باكل پرسان كد.
“باكل زياد نہ خاندوم،” على جواب دد.
“باز ام بچيم، چند خاندے؟” باكل دوباره پرسان كد.
“زياد نہ خاندوم باكل. اَمى مڈل پاس استوم،” على از پس سر خو جواب دد.
باكل طرف نوسہ دوباره توخ كد و پرسان كد “مڈل … چندوم استہ؟”
“زياد نيہ باكل!” على كم از زور جواب دد.
“باضم بچيم، چند استہ؟” باكل جدى پرسان كد.
“امى شونزده جماعت باكل،” على جواب دد.
“ماشاالله بچہ ره – زياد خاندے. آفرين،” باكل طرف نوسے خو توخ كده گفت.
“خوب بچيمہ، آلى چيز جور موشنى بخير؟،” باكل دوباره پرسان كد، مگہ على جواب نہ دد.
“او على تو ره موگيوم،” باكل طرف على توخ كده پرسان كد، مگہ على قط موبائل خو مصروف بود.
“على بچيم؟” باكل كم از زور گفت  مگہ على جواب نہ دد.
باكل ديگہ پرسان نہ كد دوباره سبیہ كدو شروع كد. يگ دفعہ سونی نوسے خو توخ كد. او یگمے ده موبائل مصروف بود.
“شونزده جماعت خانده مگہ اخلاق نہ دره. افسوس بلے خاندوى ازى،” باكل ده دل خو گفت.

Share Button