Tiredness/مندہ گی

relaxing park bench man overlooking ocean  دیبیگاہ، ہمراہِ سیاسر خو دہ پارک میدویدوم و بچے مہ بایئسکل دوانی موکد۔ تقریباً پنج دقیقہ بعد احساس کدوم کہ یگ سُستی از قافِ پائ مہ بال شد، آہستہ آہستہ طرفِ زانوی مہ رفت و بعداً از راہِ حرام مغز دہ سر مہ رسید۔ حتی الامکان کوشش کدوم کہ از یاد خو رئی کنوم مگہ نہ شود۔ امیتر معلوم موشود کہ سُستی تمام جان مہ گرفتہ رئی بود۔

” چرا سُستی احساس مونوم؟” از خود خو سوال کدوم۔ یگو فوری جواب دہ گیر نہ ماد۔ اِیطرف توغ کدوم اُوطرف توغ کدوم یگو چیزِ بد رنگہ نہ دیدوم کہ اعصاب مہ خراب کنہ۔ ھوا خوب بود۔ نہ گرم نہ یخ۔ برائ دویدن بسیار خوب روز بود۔ چمائ خو کور کدوم۔ دوبارہ واز کدوم۔ ہر چیز نوربند معلوم موشود، بسیار قشنگ۔ تمام منظرہ دہ بہترین شکل خو بود۔ سوُوز ایرمہ یگ منظرِ دلکش پیش موکد۔ درختہائ سوُوز و گلہائ رنگارنگ ام دہ بین مہ حرکت پیدا نہ تنست کہ بودہ وُوم۔

 طرفِ خاتو صاحب (صایب) توغ کدوم بسیار مقبول معلوم موشود۔

 “بخیالم کہ کمزور شدوم؟” از خود خو پُرسان کدوم۔

” یقیناً نہ،” جواب اماد۔ “ 

“اگہ کمزور نہ شدوم خو یقیناً سُست شدوم،” فکر کدوم۔ 

 “سُست اَم نہ شدوم،” دوبارہ جواب اماد۔ 

اگہ سُست نی استوم، یقیناً پیر شدوم،” از خود خو دوبارہ پُرسان کدوم۔ “بخیالم کہ از خاتو صاحب پُرسان کنوم “ ۔”

 “مہ پیر شدوم؟” از خاتو صاحب پُرسان کدوم۔ 

     نہ، تو پِیر نہ شدے۔40 سالہ استے 50 سالہ نہ،” خاتوی مہ گوفت۔ “

جوابِ خاتوی مہ، مہ رہ کم حوصلہ دَد البتہ کودم چیز مہ رہ مندہ کدہ رئی بود، معلوم نہ شود۔

چند دقیقہ بعد، خاتو رہ گفتم کم آہستہ شو۔ وقتیکہ ہر دوی مو آہستہ شودی، بسیار دہ آہستگی پُرسان کدوم ” آیا امی امکان درہ کہ دویدن آدم رہ مندہ نکنہ “؟

بوبخشین، چی گفتی؟” خاتوی مہ پُرسان کد۔ “

میخواستوم بوفہموم کہ آیا یگو امکان استہ کہ آدم روزہ بیگرہ و گشنہ نشنہ،” مہ گفتم۔ “شمو یقیناً موفہمین کہ مہ درؤ چی موگوم “۔

تو چی موگی؟ مہ ہیچ نہ موفہموم،” خاتو صاحب گوفت۔ “شمو موگین کہ آدم خریداری کنہ و پیسہ خرچ نشنہ، یعنی چی؟  بودوہ و مندہ نشنہ، بیخی عجیب گپ موگین۔” چند دقیقہ فکر کد و دوبارہ گوفت ” امیتر ہیچ امکان نہ درہ کہ آدم غسل کنہ و تر نشنہ۔بخیالم تو امروز یگوگڈ وَڈ چیز خوردے، امزو خاطر فالتو فالتو موگیی۔ بیخی مہ رہ گیج کدے۔ 

دہ جواب شی یگو گپ نہ گفتم فقط گوفتوم کہ شمو بورین و بودوین۔ خود مہ طرفِ چوکی رفتوم، شِشتوم و دہ بارے مندہ گی فکرشروع کدوم۔ طرفِ پارک توغ کدوم۔ بعضِ مردوم راہ مورفت و بعض مِیدوید۔ بعضِ مردم دہ بلے چمندی دراز خاؤ بود دہ بین خو گپ موگوفت۔ بچہ ہای ریزہ بازی کدہ رئی بود۔ سگہا ام ایطرف و اُوطرف دویدہ موکد۔ بغیر از مہ ہیچ کودم مندہ معلوم نہ موشود۔

دہ ای دوران کہ دہ بلے چوکی شِشتہ بُدوم احساس کدوم کہ شِشتو ام مہ رہ مندہ کدہ رای بود۔ نہ موفہمیدوم کہ امروز قط از مہ چیز شودہ رئی یہ۔ مہ ہمیشہ متحرک بودوم، دہ بعضِ معاملات خو بسیار زیاد۔ ولی امروز حتی کہ شِشتن ام مہ رہ مندہ کدہ رئی بود۔ خیلی شرم آور بود۔ اگہ خاتو صاحب خبر شونہ خواہد خندہ کد۔ خیلی شرمندہ گی احساس مو کدوم۔

مہ خبر بودوم کہ مہ جور تیاروم۔ خاؤ مہ اَم پورہ بود۔ یگو مرضِ ایلرجی اَم نہ دشتوم۔ چی شدہ میتنست؟

” آیا یگو بہانہ کدہ رئی بودوم؟” سوال دہ زہن مہ خلق شود۔ جواب شی ام زود اماد ” نہ۔”

اگہ نہ، باز چرا؟ دوبارہ فکر کدو شروع کدوم۔ بلے دماغ خو فشار اندختوم تا وجۂ مندہ گی رہ پیدا کنوم۔ دہ فکرای غوج بودوم کہ ایگریز آواز میماد ” تورا موگوم، دہ کجا فکر کدہ رئی یی؟ اَؤ تورا موگوم،” سوالاتِ خاتو صاحب مہ رہ از دنیای خیال واپس آوُود۔

         بوگی، چی گپہ؟” پُرسان کدوم۔ “

   بوری، خانہ بوری،” خاتوی مہ گوفت۔ “

طرفِ خانہ رئی بودی کہ از خاتو صاحب پُرسان کدوم ” دہ خیالم کہ مہ سُست شودہ رئی استوم۔

    نہ، شمو سُست نی استین،” خاتو صاحب گوفت۔ “

   اگہ سُست نی استوم، یقیناً یگو بہانہ کدہ رئی استوم؟” پرسان کدوم۔ “

 نہ، ای گپ نی استہ،” اونا اتفاق نہ کد البتہ مشورہ دَد کہ از برای خدا فالتو فالتو نہ گی۔ تمام راہ گپ نہ گوفتوم بخاطرِ کہ فکر مہ طرفِ مندہ گی بود۔ وقتیکہ خانہ رسیدوم۔ آتش خانہ رفتم۔ دروازہ یخچال رہ واز کدوم، اورنج جوس گرفتوم و بعداً شِشتوم۔ ٹیلی وژن رہ داغ کدوم۔ یگو پروگرام خوش مہ نہ ماد لہزا ٹیلی وژن رہ بند کدوم۔دہ ای دوران، خاتو صاحب اماد و گپ زدو شروع کد۔یگمے گوفتہ رئی بود۔ برای ازی کہ خاتو صاحب رہ از گپ زدو منع کنوم پرسان کدوم ” گپ زدو آدم رہ مندہ ننہ؟ 

 گپ زدو رہ خبر نہ دروم البتہ بعض آدمہا از گوش کدو ام مندہ موشنہ،” فوراً جواب دُد۔

     بخیالم امی عادتِ تمام انسانہا استہ نہ کہ فقط عادتِ مرد”، کوشش کدوم کہ از حقوقِ مردا دفاع کنوم۔  

 مہ خبر دروم، بعضِ مردا ہمیشہ بہانۂ مندہ گی مونہ۔ شوی فاطمہ، احمد، گپ زدو خوش دارہ البتہ گوش کدو اُو رہ    مندہ  مونہ۔ خوردو خوش درہ قاب شُشتو اُو رہ مندہ مونہ۔ کلان کلان گفتو دوست دَرہ البتہ از عمل دور استہ ۔ ہمیشہ دہ حالتِ شکایت استہ۔ بلے حقوقِ انسانہا زیاد گپ موگیہ البتہ دہ بارے حقوقِ زنہا محتاط استہ۔ یگ رقم آدم استہ کہ نہ دین شی معلومہ نہ دنیائ شی۔ دہ بینِ قول و فعل شی پُر از  تضادات استہ “۔

  فاطمہ موگیہ کہ شوی شی تمام روز بلے صوفہ شِشتہ ٹیلی وژن توغ مونہ ہیچ مندہ نہ موشنہ۔ دہ روزِ دا ساعت خاؤ مونہ و روز تہ بیگاہ بلے سکائپ گپ موگیہ۔ خوردو او رہ مندہ نہ مونہ البتہ سودا آوُوردو مندہ مونہ۔ خبر نہ دروم فاطمہ چیطور او رہ برداشت مونہ۔ احمد یگ روز ام دہ خانہ قط خاتون خو کومک نہ مونہ۔ ہمیشہ بہانہ مونہ کہ  مصروف استوم یا مندہ۔ شوی شی ۔۔۔

خاتو صاحب رہ منع نہ کدوم البتہ دہ ای دوران فکر کدہ رئی بودوم کہ خدایا شکر مہ فقط یگ روز مندہ بودوم وگہ نہ ما اَم مثلِ احمد دہ ہر خانہ مشہور موبودوم۔

 

Note: The punctuation marks unfortunately don’t fit properly on Hazaragi language writing as the website has been designed for English writings. Therefore readers may find some punctuations misplaced on the dialogues. I’d appreciate if someone helps me in this respect. Thanks

Share Button