گوسپو/Gospo

چند سال پیش علی وقتیکہ دہ کوئٹہ زندگی موکد اونا دہ خانہ یک نذر گریفتہ بود۔ برای ازی نذر اونا یک رشتہ دار خو کہ قصاب بود پیسہ دد کہ از گنج یک گوسپو بیارہ۔ قصاب صوب تقریبن ساعتای یازدہ گوسپو رہ دہ خانہ آوورد۔ بغ بغِ گوسپو رہ غئیدیکہ علی دہ غول اولی شنید اونا از خانہ برو بور شود۔ کلان صحت مند گوسپو بود۔ رنگ شی سیاہ و سفید بود۔ قصاب گوسپو رہ دہ درختِ توت بستہ کدہ رئي بود۔ گوسپو دہ ای دوران مسلسل بغ بغ کدہ رئي بود — ایطرف او طرف توخ کدہ رئي بود۔ مینے چیمائ شی یک خاص پریشانی و تشویش دیدہ موشود۔ بچے برار علی مینے یک کاسہ برای گوسپو آو آوورد۔ گوسپو دان خو مینے آو زد مگر آو نخورد — مسلسل بغ بغ کدہ رئي بود ۔ گوسپو ام بخیالم کہ خبر شودہ بود کہ اونا برای کودم مقصد دہ خانے ازونا امدہ بود ازوخاطر اونا بغ بغ کدہ رئي بود۔ على بخاطریکہ نیک مقصد دشت ازوخاطر اونا خوش بود کہ ای گوسپو انشاالله خوب گوشت بور مونہ۔ Continue reading


سکولہای کوئٹہ ہر سال از اولنہ ہفتے مارچ باقاعدہ برای درس و تدریس واز موشنہ۔ دہ پونزدے مارچ 1995, بعد از یک سالہ ٹریننگ, پوسٹنگ مہ دہ گورنمنٹ مڈل سکول ہنہ اوڈک شود۔ صوب ساعتای نو از خانہ پیادہ طرف بازار (بس اڈہ) رئي شودوم۔ ساعتای پاؤکم دہ بلے ویگن شیشتہ طرفِ سکول رافتوم۔ تقریبن یگو چیل منٹ بعد ویگن نزدیکِ سکول ایستاد شود۔ از ویگن برو امادوم۔ طرف سکول آہستہ آہستہ پیدل رئي شدوم۔ بلے گیٹِ سکول یک ریزہ بورڈ بود بلے شی نوشتہ بود “گورنمنٹ مڈل سکول ہنہ اوڈک کوئٹہ”۔ گیٹ سکول واز بود۔ داخل سکول شدوم۔ سکول کلان نبود، ریزہ بود۔ چار کلاس طرف دیست چپ و سہ کلاسِ دیگہ طرف دیست راس بود۔ روی بروی سکول واز بود — یگو دیوال نبود۔ درختا مثلِ دیوال وری کشت بود۔ چار پنج نفر دہ مینے سکول بلے چوکیا دہ شکلِ دائرہ دہ گرمی شیشتہ و سگریٹ کشیدہ رئي بود۔ غئیدیکہ نزدیک ازونا رسیدوم سلام کدوم۔ اونا طرف مہ توخ کدہ کم حیران شود کہ ای بچے آزرہ دہ کجا امدہ مگر زود “واعلیکم السلام” گفت۔ Continue reading

Osain Alai Eusofi/اوسین الی ایسوفی

کتابِ “فرہنگِ ادبیات ھزارہ گی: ضرب المثال و محاورات” دہ فروری 2010 دہ چھاپ رسید۔ بلے کتاب دہ تای ٹائٹل شی قد سفید رنگ نامِ حسین علی یوسفی واضح نوشتہ استہ۔ اولنہ نام ازونا قد ح۔س۔ی۔ن یعنی حسین نوشتہ استہ۔ دومنہ نام ازونا قد ع-ل-ی یعنی علی نوشتہ استہ و عین اموتر سیومنہ نام شی قد ی۔و۔س۔ف۔ی نوشتہ استہ۔ مکمل نام ازونا حسین علی یوسفی استہ۔ ای نام رہ یگو دیگہ کس بلے کتاب ازونا نوشتہ نکدہ بود بلکہ اونا خودون شی قد قلم از خود خو نوشتہ کدہ بود۔
یوسفی وقتیکہ حیات بود تمام نام ازونا رہ قد درست ہجہ (حرف) یعنی حسین علی یوسفی نوشتہ و یاد موکد۔ آلی غئیدیکہ اونا از دنیا رفتہ بعض آپوسقالہا نام ازونا رہ قد غلط ہجہ یعنی اوسین الی ایسوفی نوشتہ مونہ بخاطریکہ دہ مطابقِ فکرِ ازونا حسین علی یوسفی آزرہ گی یاد ندشت و اونا نام خو ام نموفامید کہ چیتور نوشتہ کنہ ازو خاطر آلی چند ہوشیار نفرا جم شودہ نامِ حسین علی یوسفی رہ درست کدہ رئیہ۔ Continue reading

School Inspection/اسکول انسپکشن

سالہا پیش، اولین پوسٹنگ مہ بحیثیت جونیر انگلش ٹیچر دہ مڈل اسکول کلی خَلی نزدِ کرانی بخیالم دہ مای اگست بود شود۔ کالج میخاندوم۔ تازہ جوان بودوم۔ از خانہ تقریبن یک نم ساعت بلے سائیکل دہ کرانی از مینے باغای انگور سائیکل چلاندہ طرف اسکول مورافتوم۔ واپسی ام امزی راہا طرف خانہ میمادوم۔ تقریبن ہر روز از باغ انگور میخریدوم۔ دہ پہلوی جوی دہ مینے باغ انگور زیاد مزہ میدد۔ نہ نفرت بود نہ تعصب۔ قرار قراری بود۔ دہ دو یا سہ روپیہ یک کلان پوختہ خوشے انگور میخریدوم۔ دہ باغ ازونا دو رقم انگور بود— (1) ہلکا زرد رنگ کشمشی و (2) سیاہ رنگ کلان دانہ دار۔بخاطریکہ خانے مہ دُور بود ازو خاطر از مرضی خو دہ اسکول میمادوم و از مرضی خو مورافتوم۔ یگو پابندی وقت نہ بود۔ سکول زیاد کلان نہ بود۔ قد کمرے ہیڈماسٹر شش کمرہ بود۔ دہ بعض کمرہ ہا دو کلاس یکجای میشیشت۔ تمام کلاسای شی پوختہ بود و ڈیسک دشت۔ کلاسای شی کم تاریک بود بخاطریکہ کلنای شی خیشت چیندہ دوبارہ کور کدہ بود۔ تمام کلاسا برآنڈہ دشت و روی بروی شی کلان غول اولی وری خاکی میدان بود و دہ مینے شی یک کلان سرسبز درختِ توت بود۔ Continue reading

Hazaragi Alphabets/ ہزارہ گی حروف تہجی

ہزارہ گی حروف تہجی

دیروز، دہ بروری چند ماہرِ زبان بعد از بسیار تحقیق، عرق ریزی، گفتو شنید و کتاب خاندو اونا باقاعدہ آزرہ گی حروف تہجی رہ از دیستِ مبارک ایچ ڈی پی افتتاح کد۔ دہ ای جلسہ نو منتخب آزرہ گی رہبرا، شاعرا و چند دانشورا ام تشریف دشت۔
افرادای کہ دہ ای کار پیش بود گفت کہ اونا از ہر پہلوی آزرہ گی زبان بلخصوص آواز رہ مدنظر ایشتہ ای حروف تہجی رہ تشکیل ددہ۔ برای آواز اونا لفظ phonology استعمال کد۔ بسیار خوب۔ البتہ اونا ای گپ رہ نگفت کہ کودم ماہر زبان دہ کودم کتاب گفتہ کہ فقط phonology بنیاد یک زبان استہ یا جور شودہ میتنہ — معلوم نشود۔ اگر موشود خوب بود مگر نشود۔
دہ خدمت ازونا گفتہ شونہ کہ phonology فقط یک جز زبان استہ۔ کسائیکہ وقتیکہ دہ بارے زبان گپ میزنہ اونا باید بوفامہ کہ زبان فقط دہ بلے phonology ایستہ نیہ۔ ہر زبان بلے ہفت بنیاد کہ دہ نامِ phonetics, phonology, graphemes, morphology, syntax, semantics, and pragmatics استہ — ایستہ استہ۔
ای ہفت بنیاد یک زبان رہ تشکیل میدیہ یا جور مونہ۔ اگر مو یک جُز یا علم ازی رہ از بنیاد شی خارج کنی، یک زبان زیرِ سوال قرار میگرہ کجا کہ شش جز شی بور کنی۔
افرادای کہ فقط بلے یک phonology تکیہ کدہ آزرہ گی زبان یا حروف تہجی جور مونہ از اونا گزارش استہ کہ اونا کم بیخانہ یا از یگو خانندہ آدم کہ اونا از یگو خوب یونیورسٹی زبان رہ خاندہ باشہ پرسان کنہ۔ زبان شناسی فقط کارِ زبان شناسا استہ بخاطریکہ اونا ساخت و بافتِ زبان رہ خبر درہ و موفامہ کہ زبان چیز استہ، چتور جور موشنہ و باید کودم بنیادی نکات یا پوائنٹ رہ دہ فکر بیگرہ۔ Continue reading